Tomoshabinlarga serial va novellalardagi rollari bilan yaxshi tanish bo‘lgan aktrisa Zahro Mirzayeva YouTube’dagi “Daryo” Lifestyle kanaliga intervyu berdi. Suhbat davomida u professional ijodkorlar qadrsizlangani, vayner bo‘lishi sabablari va bir voqea sabab sanʼatkor bo‘lganidan afsuslangani haqida gapirdi.
— Avvaliga vaynerlarning ijrosi menga ham juda g‘aliz tuyulardi. “Tuzukroq ijro etsa bo‘lmaydimi, shu ham rolmi?” derdim. Shu orada men va turmush o‘rtog‘imni bir telekanalning Yangi yil bayrami munosabati bilan o‘tkaziladigan shouga qarsak chalish uchun taklif etishdi. Kayfiyatimiz ko‘tariladi, sanʼatkorlarni qo‘llab-quvvatlaymiz, degan umidda alohida tayyorgarlik ko‘rib bordik. Bizning qatorimizda ko‘plab ustoz sanʼatkorlar, kino va teatr aktyorlari ham bor edi. Oradan maʼlum vaqt o‘tgach, bir gala blogerlar kirib kelishdi. Tashkilotchilar “Bo‘ldi, turinglar, choy ichadigan joyga o‘tib tursangiz ham bo‘ladi”, deyishdi. Bunday munosabat menga juda yomon taʼsir qildi. Biz shunchaki qarsak chalish uchun ham alohida tayyorgarlik ko‘rib, vaqtimizni sarflab kelsagu, bu gapni eshitish juda alam qildi. Tashqariga chiqdim-da, turmush o‘rtog‘imga “Biz ham o‘z blogimizni yuritishimiz kerak ekan, ijtimoiy tarmoq hozirgi kunda ko‘p masalalarni hal qilayotgan ekan”, dedim. Turmush o‘rtog‘im doimgidek, professional ijodkor ekanligini, talabalariga ham bu haqda ko‘p uqtirishi haqida gapirdi. “Vaynga ham professional yondashamiz”, deb videolar olishni boshladik. Avvaliga ko‘pchilikdan dakki eshitdik, sizlar professionalsizlar, vayn olish nimasi, deganlar ham bo‘ldi. Ammo mashhur hind filmi “Zita va Gita”ga parodiya qilib chiqqanimizdan so‘ng odamlarning munosabati o‘zgardi. To‘g‘rirog‘i, Kavshalyaga qilgan taqlidim ko‘pchilikka maʼqul bo‘ldi, deydi aktrisa Zahro Mirzayeva.
Aktrisa “Bu hayot” serialida suratga tushganidan afsuslangani va prodyuser gapi sabab ijoddan ketmoqchi bo‘lgani haqida gapirdi.
— “Opa-singillar” serialidagi rolim ko‘pchilikka manzur bo‘ldi. Haligacha tomoshabinlar uni eslashadi, o‘ziga xos chiqqan, ko‘zidan ayyorligi sezilardi, deyishadi. Albatta, bundan quvonaman. Rejissyor Zamira Begimqulova oradan bir necha yil o‘tib, “Bu hayot” nomli serial oladigan bo‘ldi. “Zahro avval salbiy rol ijro etgandingiz, endi ijobiy rolda o‘zingizni ko‘rsating”, deb taklif qildi. Juda quvondim, chunki unda to‘rtta bosh qahramondan birini ijro etishim kerak edi. Prodyuser ayol ko‘p gonorar berolmasligini aytdi. Rozi bo‘ldim va 22 kun davomida suratga olish ishlariga qatnadim. Rol uchun alohida liboslar xarid qildim. Suratga olish ishlari tungi ikkigacha davom etgan vaqtlar ham bo‘ldi. Dublyaj jarayonining so‘nggi kuni oldimga kelib, qo‘limga 500 ming so‘mni tutdi. Bu bir oylik mehnatim uchun ajratilgan gonorar ekan. “Bu pul hatto shuncha kun taksi uchun sarflagan pulimni ham qoplamaydi-ku”, dedim. Prodyuser hotirjam boshidan gonorar ko‘p emas, deganman dedi. “To‘g‘ri, ko‘p emas degansiz, ammo bunchalik kamligini aytmagansiz”, dedim. O‘sha kuni yanvar oyining qahraton kunlari edi, Amir Temur xiyobonidan to uyimgacha piyoda kelganman. O‘shanda birinchi marta sanʼat uchun sarflagan mehnatimga achindim. “Essiz shuncha umrim”, deya o‘z-o‘zimga pichirlardim. Eng alam qilgani, u prodyuser boshqalarga “Bu er-xotinni Zamira opadan boshqa rejissyor rolga taklif etmasa, it ham chaqirmaydi”, debdi. Buni haqorat deb qabul qildim va sanʼatdan butunlay ko‘nglim qoldi. Shunchalik depressiyaga tushib qoldimki, rollarga taklif etishsa, o‘ylab ham ko‘rmay rad etdim. Oddiy somsa xamirini qilib, sotishni boshladim. Ko‘p foyda qolmasdi, ammo sanʼatni unutishim uchun bir ermak edi, deydi Zahro Mirzayeva.
Aktrisa suhbat davomida uzoq yillar ijara uyda yashagani, pulsiz ijro etgan rollari va stress sabab bedavo dardga chalingani haqida gapirdi.
Suhbatni YouTube’dagi “Daryo” Lifestyle kanalida tomosha qiling.
Izoh (0)