Farg‘onada yo‘l chetida ketayotgan odamni Gentra urib yuborgani haqida xabarlar tarqalgandi. Viloyat IIB jabrlangan erkak vafot etganini ma’lum qildi.
Qayd etilishicha, 10-iyul kuni fuqaro F.Z. Farg‘ona shahar O‘zbekiston ovozi ko‘chasida tanishi M.A. bilan o‘zaro gap talashib janjallashib, o‘ziga tegishli Lacetti avtomobilida M.A.ni urib yuborib, tan jarohati yetkazgan. Ko‘rsatilgan tibbiy muolajalarga qaramasdan M.A. shifoxonada vafot etgan.
Mazkur holat yuzasidan F.Z.ga nisbatan Farg‘ona shahar IIB huzuridagi Tergov bo‘limi tomonidan Jinoyat kodeksining 104-moddasi 3-qismi (qasddan badanga og‘ir shikast yetkazish jabrlanuvchining o‘lishiga sabab bo‘lishi) bilan jinoyat ishi qo‘zg‘atilgan. Gumonlanuvchi F.Z. Jinoyat-protsessual kodeksining 221-moddasi tartibida ushlangan.
Jinoyat kodeksiga ko‘ra, qasddan badanga og‘ir shikast yetkazish oqibatida jabrlanuvchi vafot etsa, aybdor shaxs 8 yildan 10 yilgacha ozodlikdan mahrum qilish bilan jazolanadi.
Ijtimoiy tarmoqlarda Toshkentda ikki nafar haydovchi o‘rtasidagi ziddiyat aks etgan video ham tarqalgandi. Lacetti haydovchisi Cobalt’ni “dubinka” bilan urib qochib ketgan. Rasmiylar holat yuzasidan ma’muriy bayonnoma rasmiylashtirilib, hujjatlar qonuniy chora ko‘rish uchun sudga yuborilganini ma’lum qildi.
Izoh (0)