Chelyabinsk viloyat sudi juma kuni Rossiya oltin ishlab chiqaruvchilari bozorining uchinchi eng yirik ishtirokchisi hisoblangan “Yujuralzoloto”ni milliylashtirishga qaror qildi. Bu hukumat tomonidan xususiy aktivlarni urush sharoitida musodara qilish bo‘yicha navbatdagi keys bo‘ldi.
Rossiya Bosh prokuraturasi milliardlab dollar daromadga ega “Yujuralzoloto” kompaniyasi va u bilan bog‘liq yana 10 ta shirkatni davlat tasarrufiga o‘tkazish uchun sudga da’vo arizasi kiritgan edi. Tergov doirasida kompaniya ofislarida keng ko‘lamli tintuvlar o‘tkazilgan.
Prokuratura ma'lumotiga ko‘ra, kompaniyaning sobiq rahbari, shu bilan bir vaqtda siyosatchi hisoblangan Konstantin Strukov davlat mulozimi ekanidan foydalanib, kompaniyani noqonuniy ravishda o‘zlashtirgan. Da’voda aytilishicha, u shirkatni ochiq aksiyadorlik jamiyatiga aylantirib, nazoratini yaqin odamlari va Shveysariya fuqarosi bo‘lgan qizi Aleksandra Strukovaga topshirgan.
Konstantin Strukov o‘zining xususiy samolyotida Turkiyaga uchib ketmoqchi bo‘lgan vaqti Chelyabinsk aeroportida to‘xtatilgan. Rossiya FSB xodimlari undan xorijga chiqish pasportini olib qo‘ygan.
Sud atigi ikki kun davom etgan yopiq eshiklar ortidagi jarayondan so‘ng, kompaniyaning barcha aktivlarini darhol davlatga qaytarish haqida hukm chiqardi. Kompaniya vakillari to‘liq sud qarori eʼlon qilingach, apellyatsiya berish masalasini ko‘rib chiqishlarini ma’lum qilishdi.
Konstantin Strukov o‘zining 1,9 milliard dollar boyligi bilan Rossiyaning 78-eng boy kishisi hisoblanadi. U Chelyabinsk viloyati qonunchilik majlisida rais o‘rinbosari va hukmron “Yagona Rossiya” partiyasi a’zosi hisoblanadi. Struktov, shuningdek, rasmiy ravishda “eng boy davlat mulozimi” sifatida mashhur.
Unga tegishli “Yujuralzoloto” 2023-yilda 10,6 tonna oltin ishlab chiqarib, 25 milliard rubl (320 million dollar) daromad olgan bo‘lsa-da, kompaniyaning sof zarari 7,2 milliard rublni (90 million dollar) tashkil qilgan.
Ukrainaga qarshi keng ko‘lamli urush boshlangan 2022-yil fevralidan buyon Rossiyada 50 milliard dollar qiymatdagi xususiy mulk davlat tomonidan musodara qilingan. Bu mablag‘ mamlakatning yillik byudjet taqchilligiga yoki harbiy xarajatlarining uchdan biriga tengdir.
Izoh (0)