Eron AQSH bilan muzokaralarni Vashington islom respublikasiga qarshi hujum qilmaslik bo‘yicha kafolat berganidan so‘ng qayta boshlaydi. Bu haqda Eron tashqi ishlar vaziri Abbos Aroqchi CBS News telekanaliga bergan intervyusida ma’lum qildi.
“Muzokaralar bu qadar tez tiklanadi deb o‘ylamayman. Agar amerikaliklar muzokaralar paytida yana hujum qilmasliklariga kafolat berishsa, biz muzokaralarni qayta boshlash to‘g‘risida qaror qabul qilamiz. Shu sababli qaror qabul qilish uchun ko‘proq vaqt talab etiladi”, dedi u.
Aroqchining ta’kidlashicha, Isroil bilan bo‘lgan 12 kunlik qurolli to‘qnashuv davomida Eron “o‘zini himoya qilish qobiliyatini namoyon etgan” va “tajovuz takrorlangan taqdirda” buni yana amalga oshirishga tayyor.
Eron rahbariyati AQSH bilan kelishmovchilikni diplomatik yo‘l bilan hal etish mumkinmi, degan savolga javob berar ekan, Islom respublikasi TIV rahbari “diplomatik yechim uchun doimo imkoniyat mavjud bo‘ladi”, deya ta’kidlagan.
“Bombardimonlar ilmiy bilimlar va uran boyitish texnologiyalarini yo‘q qila olmaydi. Agar bizda bu sohada yana oldinga siljishga qat’iyat bo‘lsa, va bu qat’iyat mavjud, biz yetkazilgan zararni tezda bartaraf etishimiz va yo‘qotilgan vaqtni qoplashimiz mumkin”, deya qo‘shimcha qildi diplomat.
Uning so‘zlariga ko‘ra, Eronning tinchlik maqsadidagi yadro dasturi milliy g‘urur manbaidir.
Bundan avval Eron 29-iyun kuni BMT bosh kotibiga maktub yo‘llab, Isroil va AQSHni 12 kunlik urushda aybdor deb tan olishni talab qilgandi.
Isroil 13-iyun kechasi Eronga zarbalar berishni boshladi. Ularning maqsadi Tehronning yadro va raketa dasturlari bilan bog‘liq obyektlar edi. Bir sutkadan kamroq vaqt o‘tib, Eron javob hujumini amalga oshirdi. 22-iyun kechasi AQSH Qurolli kuchlari Eronning uchta yadroviy obyektiga hujum qildi, 23-iyun kechqurun esa Tehron Qatardagi Yaqin Sharqning eng yirik Al-Udeyd Amerika havo bazasiga raketa zarbalari berdi. Keyinroq AQSH prezidenti Donald Tramp Isroil va Eron o‘t ochishni to‘xtatish rejimiga kelishib olganini ma’lum qildi. Bu kelishuv 24-iyundan kuchga kirdi.
Izoh (0)