Tramp Eron oliy rahnamosi Xomanaiydan hayotini saqlab qolgani uchun minnatdorlik bildirishni talab qilmoqda.
Uning taʼkidlashicha, Eron oliy rahnamosi qayerda yashiringanini aniq bilgan. Biroq Isroil yoki AQSH harbiy kuchlariga uning hayotini tugatishlari uchun yo‘l qo‘ymagan.
“Men u qayerda yashiringanini aniq bilardim va Isroil yoki AQSH kuchlariga uning hayotini tugatishiga yo‘l qo‘ymadim. Men uni dahshatli va sharmandali o‘limdan qutqardim va u Rahmat prezident Tramp! deyishiga hojat yo‘q. Urushning so‘nggi bosqichida men Isroildan to‘g‘ridan-to‘g‘ri Tehronga yo‘l olayotgan samolyotlarning katta guruhini chaqirib olishni talab qildim. Bu, shubhasiz, bu juda katta halokatga olib kelgan va ko‘plab eronliklar halok bo‘lgan bo‘lar edi”, deb yozgan Tramp.
Amerika rahbari, shuningdek, Qo‘shma Shtatlar Xomanaiyning “g‘azab va nafratga to‘la” bayonoti tufayli Eronga qarshi sanksiyalarni yumshatish bo‘yicha barcha saʼy-harakatlarni to‘xtatganini eʼlon qildi.
Isroil mudofaa vaziri Isroil Kats mamlakat 12 kun davom etgan urushda Eron oliy rahbari Oyatulloh Ali Xomanaiyni o‘ldirmoqchi bo‘lganini ta’kidlagandi.
Vazir yahudiy davlati Xomanaiyni o‘ldirish uchun Qo‘shma Shtatlardan “ruxsat so‘ramasligini” aytgan. U Eron oliy rahnamosini o‘ldirmaslik uchun AQSH tomonidan ta’qiq qo‘yilganini rad etgan.
“Biz Xomanaiyni yo‘q qilmoqchi edik, ammo bunga operativ imkoniyat bo‘lmadi”, degan Kats o‘z intervyusida.
Vazirning ta’kidlashicha, Xomanaiy o‘z hayotiga suiqasd qilinishini bilgan va harbiy qo‘mondonlar bilan aloqani uzib, “juda chuqur yer ostiga” yashiringan. Kats agar Tehron yadroviy dasturini davom ettirsa, Isroil mamlakatga yana hujum qilishini ta’kidlagan.
Ammo Eron oliy rahnamosi urush paytida videomurojaatlar e’lon qilgan va uning o‘z generallaridan uzilib qolganini tasdiqlovchi dalillar mavjud emas. Xomanaiyning o‘ldirilishi mojaroning keskin tus olishiga sabab bo‘lardi. Eronda amalda davlat rahbari bo‘lishdan tashqari, oliy rahnamo butun dunyoda millionlab shia musulmonlari uchun oliy ma’naviy yetakchi hisoblanadi.
Izoh (0)