Ramzan Qodirov o‘g‘lining to‘yiga qaysi davlatlarning elchisi kelganini aytdi

Checheniston rahbari Ramzan Qodirov 17 yoshli o‘g‘li Adam Qodirovning to‘yiga mahalliy va xorijlik yuqori martabali mehmonlardan kimlar tashrif buyurgani aytdi. Bu haqda u o‘zining Telegram kanalida ma’lumot berdi.

Qodirovning so‘zlariga ko‘ra, o‘g‘li uylangani bilan tabriklash uchun to‘yga Eron, Birlashgan Arab Amirliklari, Turkiya va Qozog‘iston elchilari tashrif buyurgan. Bundan tashqari Rossiyadan quyidagi amaldorlar kelgan:

• Rossiya bosh vaziri birinchi o‘rinbosari Denis Manturov;
• bosh vazir o‘rinbosari Aleksandr Novak;
• Rossiya prezidentining Shimoliy Kavkaz federal okrugidagi muxtor vakili Yuriy Chayka;
• LDPR raisi Leonid Slutskiy;
• Moskva viloyati gubernatori Andrey Vorobev.

Shuningdek, boshqa viloyatlar rahbarlari, “jahon sporti yulduzlari, fan, madaniyat va din arboblari” kelgan. Qodirov ularning ismini oshkor qilmagan.

Men ularning barchasidan nihoyatda minnatdorman. Ular nafaqat biz bilan bayramni nishonladi, balki o‘z ishtiroklari bilan uni yanada bezab, esda qolarli va unutilmas qildi. Shunisi ajoyibki, bunday paytlarda atrofimizda o‘zimiz qadrlaydigan va munosabatlarimizni e’zozlaydigan insonlar bo‘ladi...

Buni hatto oqsoqollarimiz ham ta’kidlab, mazkur tadbirda mamlakatimiz va jahonda hurmatga sazovor bo‘lgan insonlar ko‘pligidan juda mamnun bo‘ldi. Katta avlodning bunday bahosi ham ko‘p narsani anglatadi. Rahmat sizlarga, do‘stlar! degan Qodirov.

Ma’lumot uchun, 28-iyun kuni Adam Qodirovning to‘yi bo‘lib o‘tdi. 17 yoshli kuyovning to‘yda taqqan Jacob & Co.Billionaire ASHOKA soati omma e’tiborini tortdi. Uning qiymati 27,7 million dollarga baholanmoqda.

Bundan tashqari Adam Qodirov to‘yiga cheklangan Mercedes-Benz G-Class STRONGER THAN THE 1980s avtomobilida kelgan. Bunday avtomobillar uch xil rangda 460 nusxada ishlab chiqarilgan. Avtomobil 2025-yil 16-aprelda taqdim etilgan. 

Uning Germaniyadagi boshlang‘ich narxi qariyb 190 ming dollarni tashkil etadi. 2022-yil mart oyida Yevropa Ittifoqi Rossiyaga 50 ming yevrodan ortiq qiymatdagi avtomobillarni olib kirishni taqiqlovchi sanksiyalar kiritgan edi.