AQSHning aviahujumlaridan oldin Eron 9 ta atom bombasini yaratishga yetarli miqdordagi uran zaxirasini yashirib qo‘ygan bo‘lishi mumkin. Bu haqda manbalarga tayanib Reuters xabar berdi.
Xalqaro atom energiyasi agentligi (MAGATE) va bir qator Yevropa davlatlari Eronda aviahujumlar sodir bo‘lishidan avval mavjud bo‘lgan 400 kilogrammdan ortiq 60 foizgacha boyitilgan uranning keyingi taqdiri haqida aniq ma’lumotga ega emas. Bunga G‘arb mamlakatlarining yadro dasturlar bilan shug‘ullangan hozirgi va sobiq amaldorlari bilan o‘tkazilgan suhbatlar asos bo‘ladi.
Ularning aytishicha, Tehron AQSH yoki Isroil zarbalaridan oldin uran zaxirasini yadro obyektlaridan olib chiqib, boshqa joyga ko‘chirishga ulgurgan yoki yo‘qligi noma’lum. Manbalardan biri bu vaziyat Eron va G‘arb o‘rtasida uzoq davom etadigan “mushuk-sichqon o‘yini”ga aylanayotganini ta’kidlagan.
MAGATE ma’lumotlariga ko‘ra, 2025-yilgi harbiy to‘qnashuvlardan avval Eronda 400 kilogrammdan ortiq 60 foizgacha boyitilgan uran mavjud bo‘lgan. Bu esa boyitish darajasi 90 foizga yetkazilsa, 9 ta atom bombasi yasash uchun yetarli hisoblanadi.
Hatto bu zaxiraning kichik bir qismi ham hisobdan chiqib qolsa, G‘arb uchun bu jiddiy xavf bo‘lishi mumkin. Chunki bu Eronning yadro qurolini yashirin ravishda saqlab qolish ehtimolini kuchaytiradi, deyiladi xabarda.
Eron hukumati AQSH zarbalaridan oldin ayrim yadro obyektlarini boshqa joyga ko‘chirganini bildirgandi. Financial Times gazetasi ham Yevropa razvedka xizmatlaridagi manbalarga tayanib shunga o‘xshash xulosani bergan. MAGATE bosh direktori Rafael Grossi esa bu ehtimolni inkor etmagan.
Shunga qaramay, AQSH hukumati Tehron boyitilgan uranni hujumdan oldin olib chiqib ketganiga ishonmaydi. Prezident Donald Tramp hamda Pentagon rahbari Pit Xegset buni rad etgan.
Izoh (0)