Isroilning 23-iyun kuni Tehron shahridagi Evin qamoqxonasiga bergan zarbasi oqibatida 71 kishi halok bo‘ldi. Bu haqda Eron sud hokimiyati vakili Asg‘ar Jahongir ma’lum qildi.
Amaldorning so‘zlariga ko‘ra, snaryadlar qamoqxonaning bir qator xonalariga, jumladan, tibbiyot bo‘limi, muhandislik-texnik korpusi, tashriflar zali va sud kanselyariyasiga tushgan.
Oxirgi ikkita bino yonida yashagan odamlar ham jabrlangan, deya qo‘shimcha qildi u.
Mahbuslarni ko‘rgani kelgan oila a’zolari ham halok bo‘lgani yoki jarohatlangani aytilmoqda. Bundan tashqari, jabrlanganlar orasida qamoqxona ma’muriyati xodimlari, muddatli harbiy xizmat askarlari, mahkumlar va ularning yaqinlari, shuningdek, yaqin atrofdagi binolar aholisi bor.
Bir qator yaradorlarga voqea joyida yordam ko‘rsatilgan. Boshqalari shifoxonalarga olib ketilgan, yana bir qismi davolanishdan so‘ng uylariga javob berilgan.
Hujumdan so‘ng qolgan mahbuslar Tehrondagi boshqa jazoni ijro etish muassasalariga o‘tkazilgan. Evin qamoqxonasida bir qator chet elliklar, jumladan, uch yilga ozodlikdan mahrum etilgan ikki fransuz fuqarosi saqlangan.
Hodisa fuqarolarimizni xavf ostiga qo‘ydi — bu nomaqbul, degan Fransiya tashqi ishlar vaziri Jan-Noel Barro.
Eron faollari fikricha, hujum siyosiy mahbuslar hayotini ham xavf ostiga qo‘ygan.
Izoh (0)