AQSH prezidenti Donald Tramp Amerika ma’muriyatining Eronga tinchlik yadro dasturini rivojlantirish uchun 30 milliard dollarga yaqin investitsiya olishda yordam berish rejalari haqidagi ma’lumotni rad etdi. Bu haqda u Truth Social ijtimoiy tarmog‘ida yozdi.
Qaysi yolg‘onchi OAV “Prezident Tramp Eronga harbiy bo‘lmagan yadro obyektlari qurilishi uchun 30 milliard dollar bermoqchi” deb aytmoqda? Bu bema’ni g‘oya haqida hech qachon eshitmaganman. Bu shunchaki yolg‘onchi OAV tomonidan meni kamsitish uchun o‘ylab topilgan navbatdagi uydirma. Bu odamlar kasal!”, deya ta’kidladi Tramp.
CNN telekanali ma’lumotlariga ko‘ra, bunday g‘oya so‘nggi haftalarda Yaqin Sharq va AQSHdagi asosiy ishtirokchilar tomonidan muhokama qilinmoqda. Xususan, takliflardan biri Eron yadro dasturiga 20-30 milliard dollar miqdorida investitsiya kiritishni nazarda tutadi. Bunda mablag‘lar Qo‘shma Shtatlardan emas, balki arab davlatlaridan kelib tushadi.
Ta’kidlanishicha, investitsiyalar masalasi Eron-AQSH muzokaralarining bir necha bosqichida muhokama qilingan. Bundan tashqari, bu mavzu AQSH prezidentining maxsus vakili Stiven Uitkoffning Fors ko‘rfazi mamlakatlari vakillari bilan norasmiy uchrashuvida ham ko‘tarilgan.
CNN xabar berishicha, boshqa takliflar qatorida Eronga qarshi sanksiyalarni qisman yumshatish, shuningdek, Tehronga xorijda muzlatilgan aktivlariga kirishni qaytarish imkoniyati ham tilga olingan. Bundan tashqari, Fordo shahridagi yadro obyektini uranni boyitishni nazarda tutmaydigan yadro dasturi bilan almashtirish g‘oyasi ko‘rib chiqilmoqda.
Izoh (0)