AQSH prezidenti Donald Tramp 24-iyun kuni Isroil va Eron o‘rtasida o‘t ochishni to‘xtatish kuchga kirganini e’lon qildi. Bu haqda Reuters xabar berdi.
AQSH prezidenti ikki davlatdan sulhni buzmaslikni so‘ragan.
“O‘t ochishni to‘xtatish rejimi kuchga kirdi. Iltimos, uni buzmang!” deb yozgan Tramp Truth Social ijtimoiy tarmog‘ida.
Tramp bir necha soat oldin joylagan postida o‘t ochishni to‘xtatish rejimiga birinchi bo‘lib Eron rioya qilishi, Isroil esa 12 soatdan keyin o‘t ochishni to‘xtatish rejimiga qo‘shilishini aytgandi. U mazkur kelishuvga “B-2 uchuvchilari va Eron yadroviy obyektlariga zarba berishda ishtirok etganlarning iste’dodi va jasoratisiz” erishib bo‘lmasligini alohida ta’kidlagan.
The Times of Israel nashri ham o‘t ochishni to‘xtatish boshlanganini e’lon qilgan. Isroil rasmiylari maqola chop etilgan paytda Trampning erishilgan sulh haqidagi bayonotiga izoh bermagan. Manbalarning Isroil matbuotiga aytishicha, agar barcha tomonlar uni qo‘llab-quvvatlasa, sulh saqlanib qoladi.
Isroil 13-iyun kuni Erondagi nishonlarga zarba bera boshlagan. Xususan, u yadroviy obyektlar, yuqori martabali harbiylar va yadroviy olimlarni nishonga olgandi. Eron esa Isroilga zarba berish bilan javob qaytarishni boshlagan. Qo‘shma Shtatlar ham 22-iyun kuni Eronga hujum qilib, 3 ta yadroviy obyektga zarba bergan. 24-iyun kuni esa Eron bunga javoban Qatardagi AQSH harbiy bazasiga hujum qilgandi. Tomonlar o‘rtasidagi sulhga yuqoridagi hujumlardan so‘ng erishildi.
Izoh (0)