Eronlik xakerlar AQSH prezidenti Donald Tramp yordamchilarinng elektron pochta xabarlarini oshkor qilish bilan tahdid qildi. Bu haqda Al Arabiya xabar berdi.
“Robert” taxallusi ostidagi xakerlar Reuters agentligiga 30-iyun va 1-iyul kunlari aloqaga chiqqan. Ular Oq uy ma’muriyati rahbari Syuzi Uayls, AQSH prezidenti advokati Lindsi Halligan, maslahatchisi Rojer Stoun va raqibi Stormi Denielsning taxminan 100 gigabayt elektron pochta xabarlari borligini aytgan.
Xakerlar materiallarni sotish taklifini bergan, lekin batafsil rejalarini oshkor etmagan. Ular xatlar qanday mazmunda ekanini ham ochiqlamagan. AQSH bosh prokurori Pem Bondi bu hujumni “axloq me’yorlariga zid kiberhujum” deb atagan. Oq uy va Federal qidiruv byurosi bunga quyidagicha munosabat bildirgan:
“Milliy xavfsizlikni buzgan har qanday shaxs to‘liq tekshiriladi va qonunga muvofiq javobgarlikka tortiladi”.
AQSH kibermudofaa agentligi CISA hodisa yuzasidan bayonot bermagan. Eronning Birlashgan Millatlar Tashkilotidagi missiyasi ham bunga izoh bermagan. Tehron bir necha bor kiberjosuslik sodir etganini rad etgandi.
Xakerlar dastlab 2024-yili AQSH prezidentligi saylovlari oldidan ommaviy axborot vositalariga shu kabi xabarlarning ilk partiyasini tarqatib yuborgan edi. Reuters avvalroq tarqatib yuborilgan ma’lumotlarni tahlil qilgan. Jumladan, ulardan biri Tramp va sobiq prezidentlikka nomzod kichik Kennedi nomidan advokatlar o‘rtasidagi moliyaviy kelishuv xati edi. Ushbu materiallar qatorida Trampning saylovoldi tashviqoti va kelishuv muzokaralari muhokamasi bo‘lgan. Garchi tarqab ketgan hujjatlar 2024-yili ma’lum darajada yoritilgan bo‘lsa-da, ular Trampning g‘alaba qozonishiga salbiy ta’sir etmagan.
AQSH Adliya vazirligi 2024-yil sentyabr oyidagi ayblov xulosasida “Robert” xakerlik operatsiyasini Eron inqilobiy gvardiyasi boshqarganini da’vo qilgan. Reuters bilan suhbatda xakerlar bu ayblovga izoh berishdan bosh tortgan.
Tramp saylanganidan keyin “Robert” xakerlari boshqa ma’lumot tarqatmasligini ma’lum qilgandi. Ammo guruh iyun oyida Isroil va Eron o‘rtasidagi 12 kunlik urushdan so‘ng yana harakatga kelgan. Bu safar xakerlar o‘g‘irlangan elektron xatlar savdosini uyushtirishayotganini va Reuters “bu masalani yoritishini” xohlayotganini bildirgan. AQSH kibermutaxassislari 30-iyun kuni Amerika kompaniyalari va muhim infratuzilma operatorlari hali ham Tehron kiberhujumi xavfi ostida bo‘lishi mumkinligidan ogohlantirgan.
Izoh (0)