Eronda Isroil bilan 12 kunlik urushda halok bo‘lgan 60 ga yaqin harbiy qo‘mondon va yadro olimlarining dafn marosimi bo‘lib o‘tmoqda. Bu haqda BBC xabar berdi.
Tehronning Engxelab maydonida ko‘plab olomon to‘plangan. Tobutlar ustiga qo‘mondonlarning portretlari tushirilgan va mamlakat bayrog‘i yopilgan.
Eron-Isroil urushi shu hafta boshida AQSH tomonidan o‘t ochishni to‘xtatish bilan yakunlangandi.
Dafn marosimida odamlar qora kiyim kiyib, Eron bayroqlarini hilpiratib, halok bo‘lganlarning portretlarini ko‘tarib olgan. Tadbir oldidan ommaviy axborot vositalari aholini bu marosimda ishtirok etishga chaqirgan. Avtobus va metroda harakatlanish bepul qilib qo‘yilgan. Hukumat idoralari bir kunga yopilgan.
Dafn etilayotganlar orasida Eron qurolli kuchlari shtab boshlig‘i bo‘lgan mamlakatning eng yuqori martabali harbiy zobiti Muhammad Bageri ham bor. U Isroilning Eronga uyushtirgan zarbalarida halok bo‘lgan xotini va qizi bilan birga dafn etiladi.
Eron rasmiylari urushda mamlakatda 627 kishi halok bo‘lganini aytgan bo‘lsa, Isroil Eronning raketa hujumlaridan so‘ng mamlakatda 28 kishi halok bo‘lganini bildirgan.
Dafn etilayotganlar orasida Islom inqilobi gvardiyasi bosh qo‘mondoni Husayn Salami, shuningdek, Tehrondagi Ozod universiteti rahbari bo‘lgan Muhammad Mehdi Tehronchi kabi bir qator yadroviy olimlar ham bor.
Izoh (0)