Eronning yetakchi shia ulamosi Nosir Makaram Sheroziy 29-iyun kuni AQSH prezidenti Donald Tramp va Isroil bosh vaziri Binyamin Netanyaxuga qarshi diniy fatvo chiqardi. Bu haqda The Sun xabar berdi.
Fatvoga ko‘ra, islom ummatining (ya’ni, butun musulmon dunyosining) birligini xavf ostiga qo‘yadigan yoki rahbariyatiga qarshi chiqadigan har qanday shaxs yoki davlat “mohareb” — ya’ni Allohga qarshi urush ochgan odam sifatida baholanadi.
Eron qonunchiligiga binoan, “mohareb” deb topilgan shaxslar eng og‘ir jazolarga — o‘lim, qo‘l-oyog‘ini kesish yoki surgun qilish jazolariga duchor bo‘lishi mumkin. Nosir Makaram o‘z bayonotini musulmonlarni bu “dushmanlar”dan himoya qilish bilan tugatadi.
Mazkur bayonot Tramp va Netanyaxuning Eron oliy rahbari Oyatulloh Ali Xomanaiyni nishonga olish haqidagi so‘zlari ortidan yangradi. Tramp ilgari Xomanaiyni “nishon” deb atagan, biroq “hozircha uni o‘ldirish rejamiz yo‘q”, degan edi.
Sheroziyning yuqoridagi bayonoti mazkur tahdidlar ortidan e’lon qilinmoqda. Biroq ulamo o‘z nutqida faqat islom tamoyillarini tushuntirib, Trampning nomini tilga olmagan. O‘z navbatida, Eron keyingi hujumlardan voz kechishi sharti bilan AQSH bilan yadroviy dasturi bo‘yicha muzokaralarni qayta boshlashga tayyor.
Agar AQSH diplomatik muzokaralarni qayta tiklamoqchi bo‘lsa, Eronga keyingi hujumlarni istisno qilishi kerak, degan Eron tashqi ishlar vaziri o‘rinbosari Majid Taxt-Ravanchi.
Uning so‘zlariga ko‘ra, Tramp ma’muriyati vositachilar orqali Tehronga muzokaralarga qaytishga tayyorligini ma’lum qilgan. Biroq keyingi hujumlar ehtimoli haqida “aniq pozitsiyani” bildirmagan. Iyun oyida Tramp Eron yadroviy obyektlariga zarbalar berishni buyurgan edi.
Keyinroq NATO sammitida u Eron bilan yangi muzokaralar rejalashtirilganini aytgan, ammo tafsilotlarni ochiqlamagan. AQSH prezidenti agar Eronda uranni boyitish bo‘yicha xavotirlar yana paydo bo‘lsa, uning yadroviy obyektlariga yana zarba berilishini ta’kidlagan.
Izoh (0)