Eron 29-iyun kuni BMT bosh kotibiga maktub yo‘llab, Isroil va AQSHni 12 kunlik urushda aybdor deb tan olishni talab qildi. Bu haqda The Guardian xabar berdi.
Biz xavfsizlik kengashidan Isroil rejimi va Qo‘shma Shtatlarni tajovuzkor harakatlarning tashabbuskorlari sifatida tan olishni va ularning keyingi javobgarligini, shu jumladan tovon va kompensatsiya to‘lashini rasman talab etishni so‘raymiz, deb yozgan Eron tashqi ishlar vaziri Abbos Aroqchi maktubda.
Talabni o‘z ichiga olgan maktub BMT bosh kotibi Antoniu Guterrishga yo‘llagan. Hozircha bu talabga Isroil yoki AQSH tomonidan rasmiy javob berilmagan.
Isroil 13-iyundan boshlab Eronga tinimsiz hujum qilib, uning yadroviy obyektlari, mudofaa tizimlari, yuqori martabali harbiy amaldorlari va yadrochi olimlarini nishonga oldi. Hujumlar oqibatida kamida 627 kishi, jumladan, ko‘plab tinch aholi vakillari halok bo‘ldi, deb xabar bermoqda Eron sog‘liqni saqlash vazirligi.
22-iyun kuni AQSH Isroilning harakatlariga qo‘shilib, uchta asosiy obyektga — Fordo, Natanz va Isfahonga aviazarbalar berdi. Markaziy razvedka boshqarmasi boshlig‘i Jon Retkliff operatsiya Eron yadroviy dasturiga jiddiy zarar yetkazganini ma’lum qildi. Zarbalardan ko‘p o‘tmay AQSH prezidenti Donald Tramp Eron va Isroil o‘rtasida o‘t ochishni to‘xtatish rejimi kuchga kirganini e’lon qildi, buni ikkala tomon ham tasdiqladi.
Biroq Eron rasmiylari AQSH zarbalaridan yetkazilgan zarar minimal bo‘lganini, Islom Respublikasining oliy rahbari Ali Xomanaiy esa Eronning Vashington va Tel-Aviv ustidan “g‘alaba qozonganini” e’lon qila boshladi. 25-iyunda Eron parlamenti MAGATE bilan hamkorlikni to‘xtatish to‘g‘risida qaror qabul qilgan .
Izoh (0)