Eron oliy rahnamosi Oyatulloh Ali Xomanaiy o‘zining o‘lim ehtimoliga tayyorgarlik ko‘rmoqda va allaqachon vorislarini tanlagan. Bu haqda Eron rasmiy doiralaridagi manbalarga tayanib The New York Times xabar berdi.
Manbalarning ma’lumotiga ko‘ra, Xomanaiy uchta bo‘lajak voris nomzodini belgilagan, biroq ko‘pchilik eng ehtimoliy deb hisoblagan uning o‘g‘li Mojtaba Xomanaiy ularning orasida yo‘q.
Garchi Mojtaba ham diniy arbob va Islom inqilobi qo‘riqchilari korpusi bilan bog‘liq bo‘lsa-da, uning nomzodi 86 yoshli diniy rahnamo xohish-istaklari doirasidan tashqarida qolgan, deyiladi xabarda.
Taʼkidlanishicha, Xomanaiy so‘nggi kunlarda himoyalangan bunkerdan chiqmayapti, faqat ishonchli vositachilar orqali aloqa qilmoqda. U xavfsizlik sabab barcha elektron aloqani uzgan. Shuningdek, u nafaqat voris, balki harbiy va siyosiy rahbarlik lavozimlariga muqobil nomzodlarni ham ko‘rib chiqqan.
The New York Times yozishicha, Xomanaiy o‘zining ehtimoliy o‘limini shahidlik deb biladi va hokimiyatning uzluksiz o‘tishini ta’minlashga intilmoqda. Shu munosabat bilan, oliy rahnamoni tayinlash uchun masʼul organ — Ekspertlar assambleyasiga uch nafar nomzod taqdim etilgan. Ularning birini qisqa muddatda tanlash vazifasi qo‘yilgan.
Odatda bunday jarayon bir necha oy davom etsa-da, hozirgi harbiy tanglik sharoitida Xomanaiy bu ish tez amalga oshirilishiga umid qilmoqda, deydi NYT manbalari.
Manbalar, shuningdek, Eron rasmiylari ichki tahdidlar kuchayayotganini aytmoqda. Mamlakat ichida isroillik diversantlar va mahalliy hamkorlar mavjud bo‘lib, ular muhim energetika va mudofaa obyektlariga dronlar uchirmoqda.
Isroil razvedkasi Eron xavfsizlik tizimlariga kirib olishidan qo‘rquv rasmiylarni ogohlikka chorlamoqda. Eron razvedka vazirligi barcha yuqori martabali amaldorlarga mobil telefon va boshqa elektron aloqa vositalaridan foydalanishni taqiqlagan. Shuningdek, hukumat va harbiy rahbariyat a’zolariga vaqtincha yerosti boshpanalarida qolish topshirilgan.
The New York Times manbalariga ko‘ra, Eron rahbariyatining asosiy xavotirlari — Xomanaiyning suiqasdga uchrashi, AQSHning bevosita harbiy aralashuvi va asosiy infratuzilmalar — elektr stansiyalari, neftni qayta ishlash zavodlari va to‘g‘onlarga zarba berilishidir.
Yaqin Sharqdagi keskinlikni yumshatish bo‘yicha diplomatik urinishlar hozircha natija bermadi. 20-iyun kuni kechqurun Jenevada Eron tashqi ishlar vaziri Abbos Aroqchining Britaniya, Fransiya, Germaniya va Yevropa Ittifoqi vakillari bilan muzokaralari yakuniga yetdi. Tomonlar uchrashuvdan so‘ng hech qanday oldinga siljish kuzatilmaganini bildirdi.
Izoh (0)