AQSH prezidenti Donald Tramp o‘zining Truth Social ijtimoiy tarmog‘ida Oq uyning sobiq rahbari Barak Obamani Eron yadro dasturini rivojlantirishda ayblovchi mem joylashtirdi.
“Eronning yadro dasturida kim aybdor ekanligini bilamiz!” deydi Tramp.
Amerika rahbari o‘z xabariga Obama tasvirlangan sun’iy intellekt tomonidan yaratilgan rasmni ilova qilgan. Tasvirda sobiq prezident pul dastalari oldida cho‘qqayib o‘tirganini ko‘rish mumkin.
“2016-yilda Obama ma’muriyatining Eronga 1,7 milliard dollar to‘laganini hech qachon unutmaymiz”, deyilgan yozuvda.
2016-yilda Obama ma’muriyati haqiqatan ham Eronga deyarli 40 yillik qarz bo‘yicha 1,7 milliard dollar to‘lagan. Amerika ommaviy axborot vositalari ma’lumotlariga ko‘ra, ushbu mablag‘ Eron o‘z hududiy suvlarida qo‘lga olgan to‘rt nafar AQSH harbiy xizmatchilarini asirlikdan ozod qilish maqsadida berilgan.
Bundan oldin Donald Trampning Eronga qarshi harbiy operatsiya bo‘yicha yakuniy qarorni kechiktirayotgani, mamlakatdagi vaziyatning Liviya kabi tartibsizlikka aylanib ketishidan xavotirda ekani ma’lum bo‘ldi.
Tramp 2011-yilda Liviyada sodir bo‘lgan voqealarni Eron-Isroil mojarosi rivojlanishining nomaqbul ssenariysi sifatida bir necha bor tilga olgan. Manbalardan biri aniqlik kiritishicha, prezident AQSHning harbiy aralashuvi mamlakatda beqarorlikka olib kelib, rejim o‘zgarishiga sabab bo‘lgan vaziyatning takrorlanishini istamasligini aytgan.
Bundan avval Tramp Rossiya va Ukraina o‘rtasidagi mojaroda AQSHning sobiq rahbari Jo Baydenni aybdor deb atagandi.
Izoh (0)