O‘zbekiston urushdan jabr ko‘rgan ukrainalik oilalarning bolalariga 2 mingta o‘quv qurollari to‘plamini sovg‘a qildi.
Ukrainaning O‘zbekistondagi elchixonasi urushdan jabr ko‘rgan oilalarning 97 nafar ukrainalik bolasi uchun tashkil etilgan taʼtil uchun minnatdorlik bildirdi. 5-iyundan 17-iyungacha ikki hafta davomida O‘zbekiston ular uchun g‘amxo‘rlikka to‘la haqiqiy uyga aylangani taʼkidlangan.
Qayd etilishicha, O‘zbekiston tomonining tashabbusi bilan amalga oshirilgan ushbu tashabbus xalqlar o‘rtasidagi chuqur do‘stlik va birdamlikning yorqin dalilidir. Ayniqsa, Tashqi ishlar vazirligiga benuqson muvofiqlashtirish uchun, Kasaba uyushmalari Federatsiyasiga har tomonlama yordam uchun hamda Maktabgacha va maktab taʼlimi vazirligiga qiziqarli va mazmunli dastur uchun minnatdorlik bildirilgan.
Shuningdek, gumanitar yuk — bo‘lajak maktab o‘quvchilar uchun 2000 ta “birinchi sinf o‘quvchisi to‘plami” uchun alohida tashakkur izhor etilgan.
“Bunday yordam Ukraina uchun bebaho bo‘lib, qo‘llab-quvvatlashga muhtoj bolalarga umid va tabassumlar hadya etadi. Biz sizning insonparvarligingiz va ochiqligingizni chuqur qadrlaymiz! Birgalikda biz mustahkam kelajak quramiz”, deyiladi xabarda.
O‘zbekiston tomonining ko‘magi bilan bir guruh ukrainalik bolalar dam olish va reabilitatsiya uchun Toshkentga kelgan edi. Bolalar uchun 12 kunlik maxsus dam olish va psixologik tiklanish dasturi tashkil etilgan. Ular Ukrainaning jangovar harakatlardan aziyat chekayotgan turli viloyatlaridan, xususan, Xarkov, Xerson, Nikolayev, Zaporojye, Sumi, Xmelnitskiy, Lvov va Kiyev shaharlaridan tashrif buyurgan.
Ma’lumot o‘rnida, 2023-yilda ham O‘zbekistonga Ukrainadan dam olish va reabilitatsiya uchun 45 bola hamda besh nafar hamrohlik qiluvchi guruh kelgandi. O‘shanda ular 12 kun davomida “Anor” tog‘ oromgohida dam olgandi. Bundan tashqari, O‘zbekiston ukrainalik bolalarga insonparvarlik yordamini, shuningdek, Ukrainaga gumanitar yordam yuborgandi.
Izoh (0)