“Putinga qiyin bo‘ladi”. Britaniya xalqaro sudga Rossiya prezidentiga qarshi ishda yordam berishni va’da qildi

Buyuk Britaniya adliya vaziri Dominik Raab Gaagadagi Xalqaro jinoiy sudning Rossiya yetakchisi Vladimir Putinni hibsga olish haqida order berish qarorini qo‘llab-quvvatladi, deb yozmoqda BBC.

Vazir London XJSga sud-tibbiy ekspertiza o‘tkazish va Rossiya prezidentiga qo‘yilgan ayblovlarni tekshirishda yordam berishini va’da qildi.

“Bu uzoq davom etadigan jarayon bo‘ladi, lekin Yugoslaviya haqida ham, Ruanda haqida ham shunday deyilgandi va yakunda qon to‘kilishiga javobgar bo‘lgan ko‘plab odamlar sudga tortildi”, — dedi Dominik Raab.

Britaniya vaziri, shuningdek, yaqin orada Putinga “qiyin” bo‘lishini ta’kidladi, chunki Gaaga sudining hibsga olish orderi uning XJSga a’zo davlatlarga safarlarini avtomatik ravishda bloklaydi.

O‘z navbatida, Raab hamkorlarni Putinga qarshi jarayonni qo‘llab-quvvatlashga chaqirdi va bu ishni tekshirish bo‘yicha barcha tadbirlar to‘liq texnik ko‘mak, xususan, sud ekspertizasi, guvohlarni so‘roq qilish kabilar bilan amalga oshirilishi muhimligini ta’kidladi.

“Biz bu yerda, Londonda niderlandiyalik hamkasblarimiz va butun dunyo bo‘ylab hamkorlarimiz bilan bularni qilmoqdamiz”, — dedi Britaniya adliya vaziri.

Putinni hibsga olish uchun order

Gaagadagi Xalqaro jinoiy sud17-mart kuni Rossiya prezidenti Vladimir Putinni hibsga olishga order berdi. Rossiya prezidenti Ukrainaning bosib olingan hududlaridan bolalarni Rossiyaga noqonuniy ravishda deportatsiya qilganlikda gumonlanmoqda. Shuningdek, sud Rossiyaning bolalar huquqlari bo‘yicha komissari Mariya Lvova-Belovani ham hibsga olish uchun order bergan.

Ukraina rahbari Vladimir Zelenskiy sud qarorini “tarixiy” deb atadi. Uning qayd etishicha, ukrainalik bolalarni ommaviy deportatsiya qilish Putinning ishtirokisiz amalga oshirilmagan bo‘lardi.

AQSH prezidenti Jo Bayden XSJning Putinni hibsga olishga order berish haqidagi qarori asosli deb atadi.

Putinning matbuot kotibi Dmitriy Peskov order berish haqidagi “muammoning ko‘tarilishi”ni “nomaqbul” deb atadi va Rossiya sud yurisdiktsiyasini tan olmasligini, bu esa sud qarorlari haqiqiy emasligini bildirishini ta’kidladi. Lvova-Belovaning aytishicha, xalqaro hamjamiyat uning bolalarni urush zonasidan olib chiqishdagi faoliyatini shu tariqa “yuqori” baholagan. U “o‘z ishida davom etishini” qo‘shimcha qildi.