Ўзбекистон урушдан жабр кўрган украиналик оилаларнинг болаларига 2 мингта ўқув қуроллари тўпламини совға қилди.
Украинанинг Ўзбекистондаги элчихонаси урушдан жабр кўрган оилаларнинг 97 нафар украиналик боласи учун ташкил этилган таътил учун миннатдорлик билдирди. 5 июндан 17 июнгача икки ҳафта давомида Ўзбекистон улар учун ғамхўрликка тўла ҳақиқий уйга айлангани таъкидланган.
Қайд этилишича, Ўзбекистон томонининг ташаббуси билан амалга оширилган ушбу ташаббус халқлар ўртасидаги чуқур дўстлик ва бирдамликнинг ёрқин далилидир. Айниқса, Ташқи ишлар вазирлигига бенуқсон мувофиқлаштириш учун, Касаба уюшмалари Федерациясига ҳар томонлама ёрдам учун ҳамда Мактабгача ва мактаб таълими вазирлигига қизиқарли ва мазмунли дастур учун миннатдорлик билдирилган.
Шунингдек, гуманитар юк — бўлажак мактаб ўқувчилар учун 2000 та “биринчи синф ўқувчиси тўплами” учун алоҳида ташаккур изҳор этилган.
“Бундай ёрдам Украина учун бебаҳо бўлиб, қўллаб-қувватлашга муҳтож болаларга умид ва табассумлар ҳадя этади. Биз сизнинг инсонпарварлигингиз ва очиқлигингизни чуқур қадрлаймиз! Биргаликда биз мустаҳкам келажак қурамиз”, дейилади хабарда.
Ўзбекистон томонининг кўмаги билан бир гуруҳ украиналик болалар дам олиш ва реабилитация учун Тошкентга келган эди. Болалар учун 12 кунлик махсус дам олиш ва психологик тикланиш дастури ташкил этилган. Улар Украинанинг жанговар ҳаракатлардан азият чекаётган турли вилоятларидан, хусусан, Харьков, Херсон, Николаев, Запорожье, Суми, Хмелницкий, Лвов ва Киев шаҳарларидан ташриф буюрган.
Маълумот ўрнида, 2023 йилда ҳам Ўзбекистонга Украинадан дам олиш ва реабилитация учун 45 бола ҳамда беш нафар ҳамроҳлик қилувчи гуруҳ келганди. Ўшанда улар 12 кун давомида “Анор” тоғ оромгоҳида дам олганди. Бундан ташқари, Ўзбекистон украиналик болаларга инсонпарварлик ёрдамини, шунингдек, Украинага гуманитар ёрдам юборганди.
Изоҳ (0)