Rossiyaning Ukrainaga qarshi 2022-yil 24-fevralda boshlagan urushidan buyon 12 164 nafar ukrainalik tinch aholi halok bo‘ldi, 26 871 dan ortig‘i esa jarohatlandi. Bu haqda BMT bosh kotibi o‘rinbosari Rozmari DiKarlo maʼlum qildi.
Ming kundan beri bu urush tinimsiz davom etmoqda. O‘limga olib keluvchi janglar Ukrainaning sharqiy va janubiy qismlarini tobora ko‘proq qamrab oldi. Butun shahar va qishloqlar vayronalarga aylandi, dedi BMT vakili.
U rasmiy statistik maʼlumotlarda keltirilgan 12 164 nafar qurbonning 600 dan ortig‘i bolalar ekanini ta’kidladi.
Bu faqat tasdiqlangan raqamlar. Haqiqiy holat ancha yomonroq bo‘lishi mumkin, dedi DiKarlo.
Bundan tashqari, u so‘nggi bir necha oy ichida tinch aholi orasida qurbonlar sezilarli darajada oshganiga e’tibor qaratdi. Bu Rossiya oktyabr, noyabr oylarida raketa va dron hujumlari sonini oshirgan vaqtga to‘g‘ri kelgan.
Urush oqibatida 4 millionga yaqin odam uyini tashlab ketgan, 6,8 milliondan ortiq ukrainalik esa mamlakatdan chiqib ketgan. Urush sabab ko’plab maktablar masofaviy ta’limga o‘tgan, bu esa ta’lim sifatiga jiddiy ta’sir ko‘rsatgan.
Ukraina hozir dunyodagi eng og‘ir minalangan joylardan biriga aylandi – hududining deyarli to‘rtdan bir qismi minalar bilan zararlangan – Shveysariyadan to‘rt baravar katta maydon, deya taʼkidladi BMT Bosh kotibi o‘rinbosari.
Shu bilan birga, u AQSH Ukrainaga Rossiya hududidagi nishonlarga zarba berish uchun uzoq masofali qurollardan foydalanishga ruxsat bergani haqidagi xabarlarga munosabat bildirdi.
Shuni aniq aytmoqchiman: barcha tomonlar, qayerda bo‘lishidan qat’i nazar, tinch aholi xavfsizligini va himoyasini ta’minlashi kerak, degan u.
Izoh (0)