O‘zbekiston jamoat tashkilotlari va ishbilarmonlar nomidan ukrainalik bolalarga insonparvarlik yordami yetkazildi. Bu haqda Ukrainaning Toshkentdagi elchisi Nikolay Doroshenko o‘zining Facebook dagi sahifasiga yozib qoldirdi.
Qayd etilishicha, ushbu yordam paketidan erkaklar, ayollar va bolalar uchun futbolkalar, shuningdek, 2000 ta birinchi sinf to‘plami o‘rin olgan. To‘plamdan maktab sumkasi, daftar, rasm daftari, rangli qog‘oz, plastilin to‘plami, ruchka, yelim, qalam, rangli qalam, akvarel va qalam qutisi kiritilgan.
Gumanitar yukni Ukraina—O‘zbekiston do‘stligi xalqaro jamiyati rahbari Lyubomir Bashinskiy qabul qilib olgan.
Birinchi sinf o‘quvchilari uchun to‘plamlar Zakarpat viloyati maʼmuriyatining ko‘chirilganlar markaziga topshirilgan. Ular Xarkov, Xerson, Nikolayev va Zaporojye viloyatlaridan yetimlar va ko‘chirilganlarning bolalariga topshiriladi.
Avgust o‘rtalarida nodavlat notijorat tashkilotlari va O‘zbekiston biznes tuzilmalari Ukrainaga 10,5 tonna gumanitar yordam jo‘natgandi. Ukrainaga jami 785 844 grivnaga (taxminan 21 282 dollar) qishki poyabzal, sport, bolalar va ayollar kiyimlari yuborilgan edi. Oxirida bo‘lsa Ukrainaning O‘zbekistondagi elchixonasi o‘zbekistonliklarni urushda jabr ko‘rgan ayollar va bolalarga shoshilinch yordam ko‘rsatishga chaqirgan.
Izoh (0)