O‘zbekiston sanʼati va madaniyati o‘zining boy tarixiga ega. Tabarruk 80 yoshdan oshgan aktyor-aktrisalar, rejissyorlar va madaniyat sohasi vakillari o‘z ijod mahsullari bilan o‘zbek va jahondagi san’at ixlosmandlarini ham hayratga solgan. Ularning san’at asarlari, sahnada va ekranda yaratgan obrazlari haqida eslab, yoshlikdagi hamda hozirgi suratlarini ko‘rishingiz mumkin.
Gulnora Mavayeva 93 yoshda

O‘zbekiston xalq artisti Gulnora Mavayeva 1931-yilda tug‘ilgan. U Tamaraxonim nomidagi balet maktabini, Moskvadagi xoreografiya yurtini tamomlab, Alisher Navoiy nomidagi opera teatrida ishlagan. U jahon baletlarida, jumladan “Jizel”, “Oqqush ko‘li”, “Esmeralda” kabi asarlarda bosh partiyalarni ijro etgan. U o‘zbek milliy raqslarini ham ijro etib, 1953-yilda Buxarestda “Oltin medal”ni qo‘lga kiritgan. 1971-yildan pedagoglik faoliyatini boshlagan va ko‘plab isteʼdodli raqqosalarni tarbiyalagan.
Raʼno Madrahimova 89 yoshda

Raʼno Madrahimova 1936-yilda Andijonda tug‘ilgan. Maktabda o‘qib yurgan paytida turli havaskorlik to‘garaklarida qatnashgan. O‘rta Osiyo davlat universitetining tarix fakultetini tamomlagan. Talabalik davrida “Qutlug‘ qon” filmida rol o‘ynagan. So‘ng diktorlik tanlovidan o‘tib, televideniyeda ishlagan. Shuhrat Abbosov uni “Mahallada duv-duv gap” filmida bosh rolga taklif qilgan, bu filmda arxitektor Aziza rolini ijro etib tanilgan.
Aktrisaning turmush o‘rtog‘i akademik Telman Rajabov. Hozirda ular farzandlari va nabiralari bilan Toshkentda yashamoqda.
Ali Hamroyev 88 yoshda

Taniqli o‘zbek kinorejissyori Ali Hamroyev 1937-yilda Toshkentda aktyor va ssenariylar muallifi Ergash Hamroyev oilasida tug‘ilgan. Uning onasi Anastasiya Tarasich ham kinostudiyada ishlagan. Ergash Hamroyev o‘g‘lini 3 yasharligida kinostudiyaga olib kelgan. Shu tariqa hozirgacha Ali Hamroyev kinostudiyasisiz o‘z hayotini tasavvur qilolmaydi. Bunday ijodiy muhit uning kelajakda mashhur kinorejissyor bo‘lib yetishishida yetakchi omil bo‘ldi.
U ijodiy faoliyati davomida 18 ta badiiy va 20 ta hujjatli film yaratdi.
— Mening bobom va otam rishtonlik tojiklardan, onam ukrainalik, pasportimda esa o‘zbek deb yozilgan. Axir buning biror ahamiyati yo‘q-ku! Mendan “Siz Italiyada yashadingiz, endi Rossiyada ijod qilyapsiz. Siz o‘zingizni qayerlik rejissyor deb hisoblaysiz?” degan savolga doimo “Men o‘zbek rejissyori edim, o‘zbek rejissyoriman va o‘zbek rejissyorligimcha qolaman”, deya javob qaytaraman deydi Ali Hamroyev.
Gulsara Yoqubova 88 yoshda

O‘zbekiston xalq artisti Gulsara Yoqubova 1937-yil 15-aprelda Urganchda tug‘ilgan. 1965–2003-yillarda O‘zbekiston davlat filarmoniyasining “Lazgi” ashula va raqs ansambli solisti bo‘lib faoliyat yuritgan va 1968-yilda mazkur ansamblga rahbarlik qilgan.
Gulsara Yoqubova nafaqat betakror ovoz sohibi, balki sahnada “Toshbolta oshiq”da Salomat, “Ko‘ngil qizlari”da Jonsuluv, “Ishqing bilan”da Shakaroy kabi rollarni ijro etgan mahoratli aktrisadir. U 35 yildan ortiq ijodiy faoliyati davomida o‘zbek milliy sanʼati rivojiga katta hissa qo‘shgan.
Galina Melnikova 88 yoshda

Oliy toifali suxandon Galina Melnikova 1936-yil 23-dekabrda Toshkentda tug‘ilgan. U televideniyedagi faoliyatini 1956-yilda boshlagan. Ko‘p yillar davomida “Axborot” informatsion dasturida boshlovchilik qilgan, turli tantanali marosimlarni olib borgan.
Yana u “Radio Terra” suxandoni bo‘lib, bayram konsertlari, reportajlar va hukumat konsertlarini olib borgan. “Do‘stlik” ordeni, “A.S. Pushkin” medali bilan taqdirlangan va “Oltin qalam” milliy mukofotiga loyiq topilgan.
Yoqub Ahmedov 87 yoshda

Yoqub Ahmedov 1938-yil 3-yanvarda Namanganda tug‘ilgan. Toshkent teatr va rassomlik sanʼati institutini tamomlab, 1958-yildan Hamza nomidagi O‘zbek Davlat akademik drama teatri aktyori, 1992-yildan esa direktor bo‘lib faoliyat yuritgan.
U 30 dan ortiq kinofilmda obrazlar yaratgan, jumladan, “Ganga qizi”, “O‘tgan kunlar”, “Hamza” kabi filmlarda rol o‘ynagan. Shuningdek, “O‘zbekfilm” kinostudiyasida 400 dan ortiq filmga ovoz bergan. “Alisher Navoiy”, “Ulug‘bek xazinasi”, “Diyonat”, “Girdob”, “Ichkuyov” kabi videofilmlarda ham bosh rollarni ijro etgan. Hozirda ijodiy faoliyatini tugatgan va farzandlari bilan umrguzaronlik qilmoqda.
Roza Karimova 87 yoshda

O‘zbekistonda xizmat ko‘rsatgan artist Roza Mashurovna Karimova taniqli o‘zbek va sovet sanʼatkori. U Abdulla Qahhor nomidagi satira teatrida faoliyat yuritgan. “Mehnat faxriysi” va “Madaniyat va sanʼat fidokori” ko‘krak nishonlari sohibasi. U O‘zbekiston xalq artisti marhum Ergash Karimovning ayolidir.
Rixsi Ibrohimova 87 yoshda

Rixsixon Ibrohimova 1937-yil 29-dekabrda Toshkent shahrida tavallud topgan. U Toshkent teatr va rassomchilik oliygohida tahsil olgan. Aktrisa kinoga 1967-yilda suratga olingan “Integral” nomli filmdagi roli bilan kirib kelgan. U faoliyati davomida “Kelinlar qo‘zg‘oloni”, “Shum bola” va “Yuzsiz” kabi o‘nlab bizga tanish filmlarida suratga tushgan.
Rixsi Ibrohimovani hayoti davomida muvaffaqiyatlari bilan bir qatorda, qora kunlari ham ko‘p bo‘lgan. U Chernobildagi AES halokatlarini bartaraf etish vaqtida, bir guruh sanʼatkorlar bilan o‘sha yerda konsert dasturida qatnashgan. Toshkentga qaytgach uning nurlanish bilan kasallanganligi maʼlum bo‘lgan va buning oqibatida, bir nechta og‘ir jarrohlik operatsiyalarini boshidan o‘tkazgan.
Qamara Kamolova 86 yoshda

Qamara Kamolova 1938-yili Buxoro shahrida tug‘ilgan. 1982-yilda “O‘zbekistonda xizmat ko‘rsatgan sanʼat arbobi” unvoniga ega bo‘lgan. “Achchiq danak”, “O‘zganing baxti”, “Ertaga chiqasanmi?”, “Nabiramiz militsiyada ishlaydi”, “Bo‘lmagan narsa haqida” kabi filmlar muallifidir. Qamara Kamolova filmi Germaniyadagi xalqaro kinofestival sovrindori bo‘ldi.
Dilbar Ismoilova 85 yoshda

Dilbar Ismoilova 1938-yil 11-avgustda Toshkentda tug‘ilgan. O‘zbekiston xalq artisti bo‘lgan marhum aktrisa, “Fanmonbibi” Zaynab Sadriyevaning qizidir. U teatr sahnasida yaratgan obrazlari, “Diydor” spektaklidagi Sharqiya, “Qutlug‘ qon”dagi Gulsum, “Zaharli hayot”dagi Sora, Said Ahmadning “Kelinlar qo‘zg‘oloni” va “Farmonbibi arazladi” yumoristik komediyalaridagi Lutfi rollari orqali el suygan sanʼatkorga aylangan.
Sobirjon Rahimjonov 84 yoshda

Aktyor Sobirjon Rahimjonov tomoshabinlarga “Opa-singillar” serialidagi mehribon qaynota roli bilan tanilgan. 81 yoshda bo‘lishiga qaramay, u hali ham taklif etilgan rollarni rad etmaydi va dublyajda ishtirok etadi. 11 yil oldin shifokorlar uning hayoti nihoyasiga yetib borayotganini aytgan, ammo unday bo‘lmadi.
— 70 yoshimda birinchi marta kasallikdan aziyat chekdim. “Opa-singillar” seriali suratga olish jarayonida qulog‘im orqasida tugun paydo bo‘ldi. Tahlillar saraton kasalligini ko‘rsatdi, jarrohlik amaliyoti xavfli deb topildi. 14 ta kimyoterapiya va 18 marotaba nur amaliyoti oldim. Kasalxonadagi bemorlarning ahvolini ko‘rib, Allohga shukr aytdim. Serialga qaytib kelgach, aktyorlar meni yupatishga harakat qilishdi. Davolanishlar samara berib, darddan xalos bo‘ldim. Ruhiyat muhim, inson umidsizlikka tushmasligi kerak, deydi aktyor.
Naima Po‘latova 84 yoshda

Naima Po‘latova 1939-yil 4-iyunda Toshkentda tug‘ilgan. 1963-yilda Toshkent teatr va rassomlikchilik oliygohini tamomlab, Muqimiy nomidagi O‘zbekiston davlat musiqali teatrida ishlay boshlagan. U 100 dan ortiq spektakllarda bosh rollarni ijro etgan va 1977-yilda “O‘zbekistonda xizmat ko‘rsatgan artist”, 1997-yilda “O‘zbekiston xalq artisti” unvonlariga ega bo‘lgan. Uning filmografiyasida “Kelinlar qo‘zg‘oloni”, “To‘ylar muborak”, “Ota” kabi filmlar mavjud. Shuningdek, 20 dan ortiq qo‘shig‘i O‘zbekiston radiosida efirga uzatilgan.
Xayrulla Saʼdiyev 84 yoshda

Xayrulla Saʼdiyev 1940 yil 6-dekabrda Toshkent shahrida taniqli aktyor Habib Saʼdiyev oilasida tug‘ilgan. U o‘rta maktabni tamomlagach, To‘qimachilik institutiga o‘qishga kirgan. Ammo keyinchalik Toshkent teatr va rassomchilik oliygohining aktyorlik bo‘limiga hujjat topshirgan. O‘qishni tamomlab, Yosh tomoshabinlar teatrida faoliyatini boshlagan va bir necha bolalar spektakllarida ishtirok etgan. 1969-yilda “Oy borib omon qayt” filmida epizodik rolda kinoga kirgan. “Kulol va Xurmacha”, “Alpomish”, “Shaytanat”, “Taʼziyadagi to‘y” kabi filmlarda suratga tushgan. 1986-yildan boshlab “O‘zbekiston davlat satira teatrida” faoliyatini davom ettirgan. Kursdoshi bo‘lgan Ra’no ismli qiz bilan oila qurgan, ammo uning vafotidan keyin Malika ismli ayol bilan turmush qurgan. Xayrulla Sa’diyevning uch o‘g‘il va bir qiz farzandi bor.
Mukambar Rahimova 84 yoshda

Aktrisa 1941-yilda Toshkentda tug‘ilgan. U Toshkent teatr va rassomchilik institutini “aktyorlik mahorati” va rejissyorlik yo‘nalishlari bo‘yicha tamomlagan. 1964-yilda “O‘zbekfilm” kinostudiyasiga kelgan. 13 yoshidan dublyajlar, teleko‘rsatuvlar va radiojurnallarda ishtirok etgan.
Mukambar Rahimova “Olovli yo‘llar”, “Yolg‘iz yodgorim”, “Laylak keldi, yoz bo‘ldi” kabi filmlarda rol o‘ynagan. U bir qancha radio-postanovkalar rejissyori bo‘lib, 2002-yilda O‘zbekiston xalq artisti unvoniga sazovor bo‘lgan.
Nasiba Qambarova 83 yoshda

O‘zbekistonda xizmat ko‘rsatgan artist Nasiba Qambarova ko‘p yillar mobaynida O‘zbekiston televideniyesida suxandon bo‘lib ishlagan.
Nasiba Qambarova televideniyeda erta tongdan yarim tunga qadar mehnat qilgan. G‘azal kechalari radioga borib, g‘azallar o‘qigan. Suxandonlar Qodir Maxsumov va Tuyg‘unoy Yunusxo‘jayeva bilan ishlashganini mehr bilan yodga oladi. O‘ktam Jobirov esa birinchi ustozlaridan bo‘lib, unga ko‘plab maslahatlar bergan. “Videoyozuvlar bo‘lmagan davrda bir kunda bir necha ko‘rsatuv yozilardi. Bir safar bosh og‘rig‘i sababli rejissyorni eshitadigan mikrofonni bosib yuborganman va so‘zlarim butun O‘zbekiston eshitgan. Ertasiga rahbarlar hazillashib, seni ko‘rish uchun tomoshabinlar bosh og‘rig‘i dorisi olib kelibdi”, deb aytishgan deydi suxandon.
Nasiba Ibrohimova 83 yoshda

Oliy toifali diktor Nasiba Ibrohimova1942-yil 1-mayda Toshkentda tug‘ilgan. 3-sinfligidayoq O‘zbekiston radiosida eshittirishlar olib borgan. 200 dan ortiq hujjatli va badiiy filmlarga ovoz bergan. 1964-yilda Toshkent davlat universitetining Jurnalistika fakultetini tamomlagan. 25 yil davomida turli lavozimlarda, O‘zbekistondagi partiya komitetlarida, Madaniyat vazirligi va Davlat sanʼat muzeyida faoliyat yuritgan. U UNESCO tomonidan chop etilgan “XX asr ayollari” kitobiga kiritilgan. U 1976-yilda “O‘zbekiston SSRda xizmat ko‘rsatgan artist”, 1991-yilda “Mehnat faxriysi” medali, 2002-yilda “Do‘stlik ordeni” bilan mukofotlangan.
Aziza Begmatova 81 yoshda

Aktrisa 1943-yil 7-sentyabrda Surxondaryo viloyatida tug‘ilgan. Bolaligi urush yillariga to‘g‘ri kelgan va bolalar uyida tarbiya topgan. Maktabni tamomlab, Toshkent teatr va rassomchilik sanʼati oliygohida tahsil olgan. Faoliyatini Abror Hidoyatov nomidagi O‘zbek davlat drama teatrida boshlagan. 50 dan ortiq film va spektakllarda ishtirok etgan, shuningdek, bir nechta rus filmlarida ham suratga tushgan. O‘zbek tomoshabinlariga “Checha” nomli spektakldagi Checha obrazi orqali tanilgan. U “O‘zbekiston xalq artisti” unvoni bilan taqdirlangan va hozirgi kunga qadar aktrisalik faoliyatini davom ettirmoqda.
Noila Toshkenboyeva 81 yoshda

Noila Toshkenboyeva 1943-yil 22-sentyabrda Toshkentda tug‘ilgan. 1965-yilda Toshkent teatr va rassomchilik sanʼati institutini tamomlab, kursdoshlari bilan Samarqand teatriga ishga yuborilgan. U yerda kursdoshi Asror Toshkenboyev Noilaga turmush qurishni taklif qilgan. Aktrisa “Shum bola”, “Suyunchi”, “To‘ylar muborak”, “Kelinlar qo‘zg‘oloni” kabi filmlarda rollar ijro etgan. Dublyaj sohasida 1000 dan ortiq film, multfilm va seriallarga ovoz bergan, ayniqsa “Esmeralda”, “Ayol”, “Parchalangan yuraklar” kabi seriallardagi ishlari eʼtirof etilgan.
Muhabbat Shamayeva 80 yoshda

Muhabbat Shamayeva (asl ismi Lyuba) 1944-yil 12-may kuni Buxoroda tug‘ilgan. Ijodiy faoliyatini Ijodiy faoliyatini ham Buxoroda boshlagan. 1963-1991-yillarda estrada-simfonik orkestrida yakka xonanda bo‘lgan. 1990-yillardan Nyu-Yorkdagi “Tiklanish” Buxoro yahudiylari musiqali teatrida ishlaydi. Repertuarida o‘zbek xalq qo‘shiqlari va boshqa xalqlarning qo‘shiqlari mavjud. U faoliyatida davomida Yevropa va Osiyoda ko‘plab gastrol safarlarida bo‘lgan. 2015-yilda Butunjahon musiqa institutida chiqish qilgan va 2018-yilda Toshkentda va Shahrisabzda konsert bergan.
U O‘zbekiston SSRda xizmat ko‘rsatgan marhum artist Ilyos Mallayevning turmush o‘rtog‘i bo‘lgan. Ularning Nargiza va Raj Mallayev ismli farzandlari ham xonandalik yo‘lini tanlagan. Hozirda Muhabbat Shamayeva oilasi bilan Nyu-Yorkning Queens tumanida yashaydi va marhum turmush o‘rtog‘i asos solgan “Maqom” ansamblida faoliyat yuritadi.
Rajab Adashev 80 yoshda

Rajab Adashev 1944-yil 15-iyulda Samarqand viloyatining Urgut tumanida tug‘ilgan. Maktabni tamomlagach, qurilish tashkilotlarida ishlagan va bo‘sh vaqtlarida Urgut xalq teatrida rollar ijro etgan. 1964-yilda “O‘zbekfilm” kinostudiyasida aktyor bo‘lib ishlay boshlagan, 1970-yilda Toshkent teatr va sanʼat institutini tamomlagan. Aktyorlik faoliyati davomida 60 dan ortiq filmda suratga tushgan. “Abdullajon” filmidagi obrazi uchun “Eng yaxshi erkak roli” mukofoti bialn taqdirlangan. 1997-yilda O‘zbekistonda xizmat ko‘rsatgan artist, 2010-yilda esa “O‘zbekiston Xalq artisti” unvonini olgan.
O‘zbek san’ati darg‘alarining umrlari uzoq bo‘lishini tilab qolamiz!
Izoh (0)