“Daryo” nashri 16-yanvarda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Rossiyaning 14-yanvardagi zarbalari tufayli tinch aholining halok bo‘lishi, NATOning Ukrainaga og’ir qurollar topshirishiga sabab bo‘lmoqda
Rossiyaning 14-yanvarda Dneprga berilgan raketa zarbasiga Polsha hukumati rahbari Mateush Moravetskiy izoh berib, Rossiyani zudlik bilan to‘xtatish kerakligini aytdi.
Rossiya fuqarolik obyektlariga hujum qilish va tinch aholini o‘qqa tutish orqali ongli ravishda harbiy jinoyatlarni amalga oshirmoqda. Jahon hamjamiyati agressor mamlakatni to‘xtatishi kerak, “Biz hoziroq harakatga o‘tishimiz va uni to‘xtashga majbur qilishimiz kerak”, — deyiladi Polsha bosh vaziri tvitida.
Rossiyaning Ukrainaga 14-yanvar kungi ommaviy hujumi vaqtida Dnepr shahridagi to‘qqiz qavatli turar joy binosiga raketa kelib tushdi. Raketa hujumi oqibatida 72 xonadon vayron bo‘lgan, 230 dan ortig‘i zarar ko‘rgan. So‘nggi ma’lumotlarga ko‘ra, hodisa natijasida 30 kishi halok bo‘lgan. Ukraina prezidentining so‘zlariga ko‘ra voqea joyidan o‘nlab odamlar qutqarilgan, ulardan 6 nafari bolalar bo‘lgan.
Ayni vaziyatda NATO bosh kotibi Yens Stoltenberg nemis OAVlariga bergan intervyusida yaqin orada Ukraina og‘ir qurollarning navbatdagi partiyasini olishini aytgan.
NATO tomonidan: Urush hal qiluvchi bosqichga o‘tgani aytilmoqda. Ukrainalik askarlar Germaniyada jangovar tayyorgarlikdan o‘tkazilmoqda, Rossiya esa Belarus bilan qo‘shma mashg’ulotlar boshladi
Ukrainadagi urush tugaganidan keyin NATO va Rossiya munosabatlarining normallashishini kutmaslik kerak, dedi NATO bosh kotibi Yens Stoltenberg. Bu haqda Handelsblatt xabar bermoqda.
NATO bosh kotibi, shuningdek, hozir Ukrainadagi mojaroning hal qiluvchi bosqichi ekanini aytib, Kiyev g‘alaba qozonishi uchun unga qurol-yarog‘ yetkazib berish zarur, degan fikrni bildirdi. Uning ta’kidlashicha, G‘arb davlatlari Rossiyaga past baho bermasligi kerak, uning “resurslari katta”.
“Biz urushning hal qiluvchi bosqichidamiz”, — deya ma'lum qilgan kotib, alyans mamlakatlari Kiyevga og‘ir harbiy texnika yetkazish bo'yicha olgan majburiyatlarini muhim deb atamoqda.Hozirda, AQSH Germaniyada 500 nafar ukrainalik askarni jangovar tayyorgarlikdan o‘tkazishni boshlagan.
Rossiya esa Belarus bilan 16-yanvardan 1-fevralgacha davom etadigan qo‘shma aviamashg‘ulotlarni boshlamoqda.
O‘zbekistonda elektr va gaz tarmoqlari masalasi muhokamada: ushbu sohadagi talon-torojliklar, lavozimidan ozod etilgan mas’ullar. Chiqish yo‘li qanday?
Yig‘ilishda yuzaga kelgan vaziyat sohalar hamda hudud rahbarlarining bugungi kungacha qanday ishlaganini yaqqol ko‘rsatib qo‘ygani hamda tuman va shahar hokimlari mas’uliyatni his qilmasdan, bir oy oldingi sovuq kunlardan hech qanday xulosa chiqarmagani aytildi.
Bundan tashqari, bugungi kundagi muammolarda tizimsiz ishlash, energoresurslarni talon-toroj qilish holatlari ham sabab bo‘layotgani ko‘rsatildi. Oxirgi oylarning o‘zida neft-gaz va energiya nazorati tizimlarida 192 ta korrupsiya holatlari aniqlangan.
Prezident vaziyatni o‘nglash bo‘yicha bosh vazir Abdulla Aripov va energetika vaziri Jo‘rabek Mirzamahmudovga mavjud resurslarni adolatli taqsimlab, muammoli mahallalarda odamlarga zudlik bilan yordam ko‘rsatadigan tizim yaratish topshirildi.
Qayerda gaz bo‘lmasa, suyultirilgan gaz yoki ko‘mir yetkazishni bugundanoq hal qilish vazifasi qo‘yildi. Mazkur vaziyatdan kelib chiqib Ikki oy muddatda xorijdan malakali mutaxassislar olib kelinadi va boshqaruv hamda ishlab chiqarish jarayonlarini raqamlashtirish bo‘yicha amaliy ishlar boshlanadi.
Bugungi sovuq kunlarda qarzdorlik deb, xonadonlar elektr va gazdan uzib qo‘yilmaydi.
Izoh (0)