AQSH Moliya vazirligining chet el aktivlarini nazorat qilish boshqarmasi (OFAC) Checheniston rahbari Ramzan Qodirovning onasiga sanksiya qo‘lladi.
Bayden bu sanksiyalar ukrainalik bolalarning Rossiyaga noqonuniy deportatsiya qilingani uchun qo‘llanilayotganini ta’kidlagan. Shuningdek, sanksiyalar ro‘yxatidan quyidagilar joy olgan:
- Checheniston rahbarining onasi — Aymani Qodirova;
- Checheniston hukumati rahbari — Muslim Xuchiyev;
- Chechenistondagi Inson huquqlari bo‘yicha komissar — Mansur Soltayev;
- Ichki ishlar vazirligining Axmat Qodirov nomidagi Checheniston bo'yicha maxsus polki komandiri — Zamid Chalayev;
- Kaluga viloyati bolalar huquqlari bo‘yicha komissari — Irina Ageyeva;
- Rostov viloyatidagi bolalar ombudsmani — Irina Cherkasova;
- Belgorod viloyatidagi bolalar ombudsmani — Galina Pyatix;
- Anneksiya qilingan Sevastopoldagi “Yunarmiya” rahbari — Vladimir Kovalenko;
- Sevastopol universiteti rektori — Vladimir Nechayev;
- Ukrainaning Zaporojye viloyatining qo‘shib olingan qismidagi “ta’lim vaziri” — Yelena Shapurova.
Aymani Qodirova Ukrainaning Rossiya tomonidan bosib olingan hududlari aholisi va jangarilarga gumanitar yordam jo‘natib turuvchi jamg‘armani boshqaradi.
Gaagadagi Xalqaro jinoyat sudi mart oyida Rossiya prezidenti Vladimir Putinni hibsga olishga order bergandi. U Ukrainaning bosib olingan hududlaridan bolalarni Rossiyaga noqonuniy deportatsiya qilishda gumon qilinmoqda. Xuddi shunday order bolalar huquqlari bo‘yicha ombudsman Mariya Lvova-Belovaga nisbatan ham chiqarilgan.
Izoh (0)