Rossiya 8-iyun kuni ukrainalik askarlarning jasadlari bo‘lgan poyezdlar Ukraina chegarasi tomon yo‘l olishi haqida ma’lumot berdi. Bu Kiyev bilan harbiy asirlarni almashtirish bo‘yicha janjalni kuchaytirib yubormoqda. Bu haqda CNN xabar berdi.
“Sizga shuni ma’lum qilamanki, atigi bir soatdan keyin harbiy xizmatchilarning jasadlari ortilgan repatriatsiya poyezdlari yo‘lga otlanadi”, dedi general-leytenant Aleksandr Zorin.
6 mingdan ortiq jasadni topshirishga shu hafta boshida Istanbuldagi tinchlik muzokaralari chog‘ida kelishib olingan. Ammo Ukraina bu jo‘natmani qabul qilganini tasdiqlamagan.
7-iyun kuni rossiyalik va ukrainalik harbiy asirlarning rejalashtirilgan almashinuvi amalga oshmagan. Sababi Moskva Kiyevni almashinuvni so‘nggi daqiqada kechiktirganlikda ayblagan. Ukraina rasmiylari buni Kremlning “iflos o‘yinlari” deb atagan.
Rossiya 7-iyun kuni Ukraina harbiy asirlar va halok bo‘lgan askarlarning jasadlarini almashinuvini kutilmaganda kechiktirganini, yuzlab ukrainaliklarning jasadlari almashtirish punktida muzlatgichli yuk mashinalarida kutib turganini va ularni olib ketish uchun hech kim yo‘qligini bildirgan.
Ukraina Rossiyaning voqealar haqidagi hisobotini rad etib, tomonlar 7-iyun kuni og‘ir yaradorlar va yosh qo‘shinlarni almashishga kelishib olgani, ammo askarlarning jasadlarini vatanga qaytarish sanasi hali belgilanmaganini aytgan.
2-iyun kuni Istanbulda bo‘lib o‘tgan to‘g‘ridan-to‘g‘ri tinchlik muzokaralarining ikkinchi raundida Rossiya va Ukraina dam olish kunlari ko‘proq mahbuslarni almashishga kelishib olgan. Rossiyaning Ukraina bilan tinchlik muzokaralari bo‘yicha delegatsiyasi rahbari Vladimir Medinskiy bu hafta 3 yillik urush boshlanganidan beri eng katta ayirboshlash bo‘lishini aytgan.
“Istanbul kelishuvlariga qat’iy rioya qilgan holda, Rossiya tomoni 6000 dan ortiq halok bo‘lgan ukrainalik harbiy xizmatchilarning jasadlarini, shuningdek, 25 yoshgacha bo‘lgan og‘ir yaralangan askarlarni topshirish bo‘yicha gumanitar operatsiyani boshladi” dedi Medinskiy.
Uning ta’kidlashicha, almashinuv punktida halok bo‘lgan 1 212 nafar ukrainalik askarning jasadi bo‘lgan, qolganlari hamon “yo‘lda”. Shuningdek, u Rossiya ayirboshlashni boshlash uchun Ukrainaga yaradorlar, og‘ir kasallar va yoshlar ro‘yxatiga kiritilgan 640 nafar harbiy asirning birinchi ro‘yxatini berganini bildirgan.
“Afsuski, konstruktiv muloqot o‘rniga biz yana manipulyatsiya va axborot maqsadlarida nozik gumanitar masalalardan foydalanishga duch kelmoqdamiz. Rossiya tomonini iflos o‘yinlar o‘ynashni to‘xtatishga chaqiramiz”, degan Ukrainaning harbiy asirlar bilan ishlashni muvofiqlashtirish shtabi.
Izoh (0)