Hukmron Xristian-demokratik ittifoq partiyasidan Bundestag deputati Roderix Kizevetter Germaniyada qolgan rossiyalik diplomatlarni mamlakat hududidan chiqarib yuborishni va Berlindagi Ruslar uyini yopishni talab qildi. Bu haqda Deutsche Welle nashri xabar bermoqda.
“Qolgan agent va diplomatlarni chiqarib yuborishimiz shart. Past darajadagi agentlarni yollashga qarshi choralar ko‘rish zarur. Bundan tashqari, Berlindagi Ruslar uyi va boshqa shu kabi muassasalarni yopish kerak edi”, - deya ta’kidladi Bundestagdagi maxsus xizmatlar bo‘yicha parlament qo‘mitasi rais o‘rinbosari lavozimini ham egallab turgan Kizevetter.
U bu bilan tez-tez sodir bo‘layotgan kiberhujumlar va gibrid hujumlar fonida qanday choralar ko‘rish kerakligi haqidagi savolga javob berdi.
Shuningdek, u rossiyalik sayyohlarga viza berishni taqiqlash, bir qator axborot manbalarini yopish va dezinformatsiya tarqatilayotgan ijtimoiy tarmoqlardagi sahifalarni bloklashni taklif etgan.
Jangari bayonotlari bilan tanilgan Kizevetterning o‘zi yanvar oyida X ijtimoiy tarmog‘ida hozirda sobiq kansler hisoblangan Olaf Sholsning go‘yoki Moskvaga tashrifi rejalashtirilgani haqidagi postini o‘chirib tashlashga majbur bo‘ldi.
2023-yilda Germaniya bir necha o‘nlab rossiyalik diplomatlarni mamlakatdan chiqarib yubordi, bunga javoban Rossiya ham nemis diplomatik vakolatxonalari xodimlarini xuddi shunday miqdorda chiqarib yubordi. Natijada Germaniya Yekaterinburg, Kaliningrad va Novosibirskdagi bosh konsulliklarini, Rossiya esa Gamburg, Leypsig, Myunxen va Frankfurt-Mayndagi bosh konsulliklarini yopishga majbur bo‘ldi.
Izoh (0)