Bundestag (Germaniya parlamenti) Ukrainaga 400 million yevro miqdorida qo‘shimcha yordam ajratishni ma’qulladi.
Bu haqda Mudofaa vazirligi huzuridagi Ukrainaga yordam ko‘rsatishni muvofiqlashtirish bo‘yicha ishchi guruh rahbari Kristian Freyding RND nashriga bergan intervyusida ma’lum qilgan.
“Biz hozirgina Bundestagdan 2024-yil uchun qo‘shimcha 400 million yevro yordam ajratishga ruxsat oldik. Bu bizga joriy yilda umumiy qiymati 1,4 milliard yevro bo‘lgan 50 ta loyihani amalga oshirish imkonini beradi”, dedi u.
Shuningdek, u Germaniya Ukrainani qo‘llab-quvvatlashda davom etishini ta’kidladi. O‘tgan haftada Ukraina ikkita IRIS-T SLM va SLS zenit tizimlarini oldi. Yil oxirigacha mamlakatga yana ikkita zenit tizimi, piyodalar jangovar mashinalari, tanklar va artilleriya o‘q-dorilari yetkazib beriladi.
Avvalroq Yevropa ittifoqi diplomatiyasi rahbari Jozep Borrel Ukrainadagi urush G‘arb yordamisiz 2 hafta ichida tugashini aytib o‘tgandi.
“Ko‘pchilik bu mojaroning tezroq tugashini xohlaydi. Agar biz Ukrainani qo‘llab-quvvatlashni to‘xtatsak, 15 kundan so‘ng urush tugaydi va Putin o‘z maqsadlariga erishadi. Biroq biz ukrainlar uchun shunday bo‘lishini xohlaymizmi?”, dedi Borrel.
Yevropa diplomatiyasining rahbari bunday ssenariy Yevropa ittifoqi uchun mutlaqo maqbul emasligini ta’kidladi. U Ukrainadagi mojaroning yevropaliklar xavfsizligiga ham aloqasi borligini aytdi.
Izoh (0)