“Biz urushni Yevropa manfaatlari yo‘lida yakunlaymiz” — Zelenskiy

Ukraina prezidenti Vladimir Zelenskiy Bundestagda nutq so‘zlab, Rossiya-Ukraina urushiga Yevropa manfaatlari yo‘lida yakun yasalishini aytdi.

Zelenskiy nutqi Bundestag a’zolari tomonidan qarsaklar bilan o‘n martadan ortiq olqishlangan. U o‘z nutqini Rossiya bilan urushda Ukrainani qo‘llab-quvvatlagani uchun Germaniya xalqi va hukumatiga minnatdorlik bildirish bilan boshlagan.

Biz bu urushni tugatamiz, uni Ukraina manfaatlari, butun Yevropa, barchamiz va bizdan keyin keladiganlar manfaati yo‘lida tugatamiz, — deb va’da bergan Zelenskiy.

U janglar Kiyev shartlariga ko‘ra yakunlanishi kerakligini qo‘shimcha qilgan. Shundan so‘ng Zelenskiy Germaniya tarixidagi ikki qismga bo‘lingan vaqtni yodga olgan.

Shu sababli nima uchun biz Rossiyaning Ukrainani bo‘lishga urinishlariga qarshi shunchalik qattiq kurashayotganimizni, nega biz mamlakatimizning bir qismi o‘rtasida devor paydo bo‘lishiga yo‘l qo‘ymaslik uchun hamma narsa qilayotganimizni tushunasiz, — deya qo‘shimcha qilgan Ukraina rahbari.

Uning so‘zlariga ko‘ra, urushni boshlaganlar tinchlikni abadiy unutishi, urush uchun javobgarlikni o‘z zimmasiga olishi, bu urushning har bir kechasi uchun adolatli javob berishi kerak. Uning qo‘shimcha qilishicha, Rossiyaning barcha mumkin bo‘lgan aktivlari Ukrainani urushdan keyingi rekonstruksiya qilish uchun ishlatilishi lozim.