Helsinki aeroportidagi ish tashlashlar sababli Finnair aviakompaniyasi yuzdan ortiq reysni bekor qiladi

Finlyandiyaning Finnair aviakompaniyasi 30 may juma kuni Helsinki aeroportidagi ish tashlashlar tufayli 110 ga yaqin reysni bekor qilishi haqida ogohlantirdi. Bu haqda aviakompaniya bayonotida aytilgan

Bekor qilinishlar 8 mingga yaqin yo‘lovchiga ta’sir ko‘rsatishi mumkin

Shuningdek, keyingi dushanba va chorshanba kunlari ham ish tashlashlar bo‘lishi kutilmoqda. Finnair bu ikki kundagi parvozlarga ta’sirini baholashni davom ettirayotganini ma’lum qildi, ammo jadvalda uzilishlar ehtimoli yuqori ekanligini ta’kidladi.

Finnair va IAU aviatsiya xodimlari kasaba uyushmasi o‘rtasida ish haqi masalasida kelishmovchiliklar mavjud

Shu oyning boshida Helsinki aeroportidagi to‘rt kunlik ish tashlashlar tufayli kompaniya allaqachon 410 ga yaqin reysni bekor qilishga majbur bo‘lgan, bu esa 39,5 ming yo‘lovchining manfaatlariga ta’sir ko‘rsatgan

Mart oyida Germaniyaning 13 aeroportida Ver.di xizmat ko‘rsatish sohasi xodimlari kasaba uyushmasi tomonidan xodimlarning ogohlantiruvchi bir kunlik ish tashlashlari o‘tkazilgandi.

Germaniya aeroportlari birlashmasi ADV ma’lumotlariga ko‘ra, Ver.di kasaba uyushmasi e’lon qilgan ish tashlash oqibatida 3400 dan ortiq parvoz bekor qilingan va 510 mingga yaqin yo‘lovchining rejalari o‘zgargan.

Noyabr oyida Finlyandiyaning Finnair aviakompaniyasi uchuvchilar kasaba uyushmasining ish tashlashi sababli 9 va 13-dekabr kunlari 300 ga yaqin reysni bekor qilgandi. Oktyabr oyida esa Belgiyadagi Sharlerua xalqaro aeroporti xususiy xavfsizlik kompaniyasi xodimlarining ish tashlashi sababli barcha uchib ketish reyslarini bekor qilishga majbur bo‘lgandi.