Bundestag (Germaniya parlamenti) Byudjet qo‘mitasi Ukrainaga 3 milliard yevro miqdorida qo‘shimcha harbiy yordam ajratishni ma’qulladi, deb xabar bermoqda AFP.
Mablag'lar o'q-dorilar, dronlar, zirhli mashinalar va havo hujumidan mudofaa tizimlarini sotib olishga mo'ljallangan. Germaniya kansleri Olaf Sholsning koalitsion hukumatidagi kelishmovchiliklar tufayli bu qaror bir necha oyga kechiktirildi.
Moliyalashtirish Bundesrat (Germaniyaning federal shtatlarini ifodalovchi qonun chiqaruvchi organ) mudofaa xarajatlariga cheklovlarni olib tashlaydigan konstitutsiyaga o'zgartirishlarni ma'qullaganidan keyin kuchga kiradi. Moliya vaziri Yorg Kukis o‘tgan hafta parlamentning byudjet qo‘mitasiga yo‘llagan maktubida Ukrainaga 2025-yilda qo‘shimcha 3 milliard yevro ajratish rejalarini ma’lum qilgandi.
Germaniya bu yil uchun byudjetda belgilangan 4 milliard yevrodan tashqari Ukrainaga 3 milliard yevro harbiy yordam beradi. 2026-2029 yillar uchun yana 8,3 milliard yevro ajratilishi rejalashtirilgan. Germaniya hukumati matbuot kotibi Shteffen Xebstreytning aytishicha, Ukraina uchun navbatdagi yordam paketi IRIS-T havo mudofaa tizimlarini o'z ichiga oladi. Ularning yetkazib berilishi yaqin ikki yil ichida kutilmoqda.
Izoh (0)