Prezident Shavkat Mirziyoyev Germaniya Federal kansleri Fridrix Mertsni ushbu lavozimga saylangani munosabati bilan tabrikladi va eng ezgu tilaklarini bildirdi. Bu haqda Prezident matbuot kotibi xabar berdi.
Maʼlum qilinishicha, davlat rahbari o‘z maktubida kansler rahbarligidagi hukumatning boshqaruvi ostida Germaniya jahonning yetakchi demokratik va iqtisodiy rivojlangan mamlakati sifatida o‘z mavqeyini yanada mustahkamlashda davom etishiga ishonch bildirgan.
O‘zbekiston Yevropa Ittifoqidagi anʼanaviy va vaqt sinovlaridan o‘tgan hamda muhim hamkor bo‘lgan Germaniya bilan ko‘p qirrali hamda uzoq muddatli aloqalarni chuqurlashtirishga ustuvor ahamiyat qaratishi taʼkidlangan.
“Siz bilan birgalikdagi qatʼiy saʼy-harakatlarimiz bilan “yashil” iqtisodiyot, investitsiyalar, infratuzilma, texnologiyalar, taʼlim, sog‘liqni saqlash, ekologiya va boshqa ustuvor sohalardagi sherikligimiz jadal rivojlanib, kelgusida mutlaqo yangi bosqichga ko‘tarilishiga aminman”, deyiladi prezident maktubida.
Maʼlumot uchun Bundestag ikkinchi urinishda ko‘pchilik ovoz bilan xristian demokratlar yetakchisi Fridrix Mertsni Germaniya kansleri etib sayladi. Unga g‘alaba qozonish uchun zarur bo‘lgan 316 ta mutlaq ko‘pchilik ovozdan 325 nafar deputat ovoz berdi. Uning tayinlanishiga 289 nafar parlament a’zosi qarshi chiqdi.
Izoh (0)