Ispaniyaning “Betis” klubida ijarada o‘ynagan “Manchester Yunayted” futbolchisi Antoni faoliyatini Germaniya Bundesligasida davom ettirishi mumkin. Kicker nashri xabariga ko‘ra, braziliyalik vingerga “Bayer” jiddiy qiziqish bildirmoqda.
Manbaga ko‘ra, leverkuzenliklar “Liverpul”ga o‘tishi kutilayotgan Florian Virtsga munosib o‘rinbosar qidirmoqda. Bu transferning amalga oshish ehtimoli yuqori baholanmoqda. Sababi yaqinda “Bayer” boshqaruviga kelgan Erik ten Hag va Antoni uzoq vaqtdan beri tanish. Ular nafaqat “Manchester Yunayted”da, balki “Ayaks”da ham birga ishlashgan. Shu bois braziliyalik futbolchining “Bayer”ga kelishi haqiqatdan yiroq emas.
Virtsning o‘rnini bosish uchun “Bayer” boshqa futbolchilar nomzodini ham ko‘rib chiqmoqda — Rayan Sherki, Aleksandro Garanacho. Ularning barchasi yuqori darajadagi hujumkor o‘yinchilar hisoblanadi.
Ma’lumot uchun, Antoni “Manchester Yunayted” futbolchisi hisoblanadi. U “qizil iblislar” safida o‘z o‘yinlarini ko‘rsata olmagach, qishda “Betis”ga ijaraga o‘tdi. U ispan klubi safida 26 uchrashuvda maydonga tushib, o‘z hisobiga 9 ta gol va 5 ta assist yozdirib qo‘ygan. Transfermarkt portali futbolchining qiymatini 20 million yevroga baholamoqda.
Izoh (0)