“Real Madrid” hali ham “Bayer” yarim himoyachisi Florian Virtsni qo‘lga kiritish fikridan voz kechmagan. Bu haqda AS nashri xabar bermoqda.
Manbaga ko‘ra, madridliklar futbolchi uchun kurashda “Liverpul” ustun ekanligini bilsa-da, nemis futbolchisini sotib olish fikridan qaytmagan.
Mersisaydliklar yaqin vaqtgacha Virts uchun asosiy da’vogarlar ro‘yxatida yo‘q edi. Asosiy kurash “Bavariya”, “Manchester Siti” va “Real Madrid” o‘rtasida kechayotgani aytilgandi. Germaniya nashrlarida esa Virts myunxenlikalar safiga o‘tishi borasida mish-mishlar taqalgandi, biroq so‘nggi soniyalarda “Bavariya” futbolchi uchun kurashdan chiqdi.
“Real” tomondagilar Xabi Alonsodan umid qilib turibdi. Chunki futbolchi va murabbiy uzoq vaqt davomida “Bayer”da birga ishlagan. Ispaniyalik mutaxassis yaqinda “qirollik klubi” bosh murabbiyi etib tayinlandi. “Qaymoqranglilar” rahbariyati Alonsoning kelishi futbolchining fikrini o‘zgartiradi deb o‘ylamoqda.
AS nashriga ko‘ra, Virts yozning eng katta transferlaridan biri bo‘lishi mumkin. Sababi “Bayer” klubi bosh direktori Fernando Karro aprel oyida futbolchining narxini 150 million yevro deb belgilagan edi.
Joriy mavsum Virts “Bayer”ning barcha musobaqalar doirasidagi 45 o‘yinda maydonga tushib, o‘z hisobiga 16 ta gol va 15 ta golli uzatma yozdirib qo‘ygan. Transfermarkt portali Florianning qiymatini 140 million yevroga baholamoqda.
Izoh (0)