Italiya G7 mamlakatlari o‘rtasida elektr energiyasi ishlab chiqarishda ko‘mirdan foydalanishni to‘xtatish bo‘yicha umumiy sanani belgilashda kelishuvga chaqirmoqda. Bu haqda diplomatik manbalarga tayanib, Reuters xabar berdi.
Bu yil G7 uchrashuviga raislik qilayotgan Italiyaning o‘zi 2025-yilgacha Sardiniya orolidagilardan tashqari barcha ko‘mir elektr stansiyalarini yopishni rejalashtirmoqda.
Germaniya va Italiya ko‘mirdan voz kechish bo‘yicha kelisha olmayapti.
Germaniya Italiyaning ko‘mirni bosqichma-bosqich bekor qilish muddatini belgilash harakatlariga qarshi, — deb yozadi Reuters.
2020-yilda Bundestag 2038-yilda ko‘mirdan voz kechish to‘g‘risidagi qonunni qabul qilgan edi. Energiya ishlab chiqarish uchun qattiq va qo‘ng‘ir ko‘mirdan foydalanish 2035-yilga kelib to‘xtatilishi mumkin. 2022-yilda Shimoliy Reyn-Vestfaliya federal shtati 2030-yilgacha qo‘ng‘ir ko‘mirdan elektr energiyasi ishlab chiqarish uchun foydalanishni to‘xtatishini ma’lum qilgan.
Bugungi kunda ko‘mir Germaniyada elektr energiyasi ishlab chiqarish uchun ikkinchi muhim energiya manbai hisoblanadi, — deya qo‘shimcha qilgan nashr.
2023-yil bahorida Yaponiyaning Xirosima shahrida bo‘lib o‘tgan G7 sammitida G7 davlatlari ko‘mirni bosqichma-bosqich to‘xtatish muddatlari bo‘yicha kelisha olmagan edi. Biroq, ular qazib olinadigan yoqilg‘idan voz kechish bo‘yicha kelishuvga erishgan. Unga ko‘ra, mamlakatlar 2050-yilgacha energiya tizimlarida uglerod neytralligiga erishish uchun qazib olinadigan yoqilg‘idan bosqichma-bosqich voz kechishni tezlashtirish majburiyatini olgan.
Izoh (0)