Germaniya Ukrainaga qo‘shimcha “Gepard” o‘ziyurar zenit qurollarini yuboradi. Bu haqda Germaniya kansleri Olaf Sholsga tayanib, BBC va CNN xabar bermoqda.
“Biz yaqindagina qo‘shimcha ‘Gepard’ yetkazib berish imkoniyatlarini ishga tushirdik”, — dedi Shols tafsilotlarni keltirmasdan. Qayd etilishicha, Germaniya avval Ukrainaga 30 ta shunday qurol topshirgan.
Shuningdek, Olaf Shols 29-noyabr kuni Ukraina prezidenti Vladimir Zelenskiy bilan telefon orqali muloqot qilgan. Ukraina tomoni suv va elektr ta’minoti infratuzilmasiga Rossiya tomonidan berilgan zarbalar oqibatlari haqida gapirgan. Bunga javoban Germaniya kansleri hujumlarni qoralagan va hamkasbini doimiy qo‘llab-quvvatlashga ishontirgan.
“Hozirgi kunga qadar Germaniya hukumati energetika infratuzilmasini ta’mirlash uchun taxminan 56 million yevro miqdorida qisqa muddatli moliyaviy yordam ko‘rsatdi. Germaniya yana 350 dan ortiq generator taqdim etadi”, — deyiladi Bundestag matbuot xizmati xabarida.
Avgust oyi boshida Ukrainaga Germaniyada ishlab chiqarilgan birinchi uchta “Gepard” o‘ziyurar zenit qurollari yetkazib berilgan.
Izoh (0)