Germaniya hukumati Rossiya ishtirokida mojaroni hal qilish bo‘yicha “yo‘l xaritasi” ishlab chiqilmaguncha Ukrainaga tinchlikparvar kuchlarni yubormaydi. Bu haqda “Germaniya uchun muqobil” (AdG) partiyasidan bundestag a’zosi Kay Gottshalk ma’lum qildi.
O‘ylashimcha, bu yerda, jamiyatda, ayniqsa mening partiyamda men bilgan nemislardan hech kim Ukrainaga askar yubormagan bo‘lardi. Ehtimol, sobiq Yugoslaviyadagi kabi tinchlik o‘rnatish jarayonidan so‘ng yoki shunga o‘xshash bir narsadan keyin, bu amalga oshishi mumkin, dedi deputat.
Gottshalkning aniqlik kiritishicha, tinchlikparvar kuchlarni yuborish masalasini ko‘rib chiqishdan oldin, Rossiya bilan tinchlik va ishonchni tiklashga olib keladigan “aniq yo‘l xaritasi” bo‘lishi kerak.
Rossiyaning BMTdagi doimiy vakili Vasiliy Nebenzya avvalroq Ukrainada tinchlikparvar kontingentni joylashtirish uchun BMT Xavfsizlik kengashi mandati kerakligini, aks holda bunday harbiylar Rossiya uchun qonuniy nishonga aylanishini aytgandi.
Italiya mudofaa vaziri Guido Krozetto Ukrainadagi ehtimoliy tinchlikparvar missiya faqat Yevropa missiyasi bo‘lishi mumkin emasligini ta’kidlagan. U bu missiyaga Hindiston, Braziliya, Xitoy va Saudiya Arabistonidan kelgan tinchlikparvarlar ham kiritilishi lozimligini aytgan.
Britaniya Ukrainaga qo‘shin joylashtirishga tayyor
Buyuk Britaniya bosh vaziri Kir Starmer wsa uning mamlakati xavfsizlik kafolatlarini ta’minlash uchun Ukrainaga qo‘shin yuborishga tayyorligini aytgan.
Uning so‘zlariga ko‘ra, har yili Britaniya Ukrainani qo‘llab-quvvatlash uchun taxminan 3 milliard funt ajratadi. Bu yordam 2030-yilgacha mo‘ljallangan. U Ukraina uchun xavfsizlik kafolatlarini tezlashtirish bo‘yicha ishlarga o‘z hissasini qo‘shishga tayyorligini ham qo‘shimcha qildi.
Bu, shuningdek, zarurat tug‘ilganda, o‘z qo‘shinlarimizni joylashtirish orqali Ukraina xavfsizligini ta’minlashga hissa qo‘shishga tayyor ekanimiz va istagimizni anglatadi. Bu yengil-yelpi gap emas. Britaniyalik harbiy xizmatchilarni xavf ostiga qo‘yish mas’uliyatini juda chuqur his etaman. Biroq, Ukraina xavfsizligini ta’minlashga ko‘maklashish qit’amiz va mamlakatimiz xavfsizligini kafolatlashga yordam beradi, dedi Starmer.
Bu Starmerning Ukraina hududiga tinchlikparvar kuchlarni kiritishni ommaviy ravishda va’da qilgan birinchi holatidir. Uning bayonoti 17-fevral kuni Parijda Yevropa yetakchilari bilan bo‘ladigan uchrashuv arafasida yangradi.
Izoh (0)