Ҳукмрон Христиан-демократик иттифоқ партиясидан Бундестаг депутати Родерих Кизеветтер Германияда қолган россиялик дипломатларни мамлакат ҳудудидан чиқариб юборишни ва Берлиндаги Руслар уйини ёпишни талаб қилди. Бу ҳақда Deutsche Welle нашри хабар бермоқда.
“Қолган агент ва дипломатларни чиқариб юборишимиз шарт. Паст даражадаги агентларни ёллашга қарши чоралар кўриш зарур. Бундан ташқари, Берлиндаги Руслар уйи ва бошқа шу каби муассасаларни ёпиш керак эди”, - дея таъкидлади Бундестагдаги махсус хизматлар бўйича парламент қўмитаси раис ўринбосари лавозимини ҳам эгаллаб турган Кизеветтер.
У бу билан тез-тез содир бўлаётган киберҳужумлар ва гибрид ҳужумлар фонида қандай чоралар кўриш кераклиги ҳақидаги саволга жавоб берди.
Шунингдек, у россиялик сайёҳларга виза беришни тақиқлаш, бир қатор ахборот манбаларини ёпиш ва дезинформация тарқатилаётган ижтимоий тармоқлардаги саҳифаларни блоклашни таклиф этган.
Жангари баёнотлари билан танилган Кизеветтернинг ўзи январь ойида Х ижтимоий тармоғида ҳозирда собиқ канцлер ҳисобланган Олаф Шольцнинг гўёки Москвага ташрифи режалаштирилгани ҳақидаги постини ўчириб ташлашга мажбур бўлди.
2023 йилда Германия бир неча ўнлаб россиялик дипломатларни мамлакатдан чиқариб юборди, бунга жавобан Россия ҳам немис дипломатик ваколатхоналари ходимларини худди шундай миқдорда чиқариб юборди. Натижада Германия Екатеринбург, Калининград ва Новосибирскдаги бош консулликларини, Россия эса Гамбург, Лейпциг, Мюнхен ва Франкфурт Майндаги бош консулликларини ёпишга мажбур бўлди.
Изоҳ (0)