Mahsulotlar tarkibidagi plastik mikrozarralar va ruhiy salomatlik o‘rtasidagi bog‘liqlik bir qancha ilmiy ishlarda isbotlangan.
Brain Medicine jurnalida chop etilgan tadqiqotda qayta ishlangan shakari ko‘p, to‘yingan yog‘ va natriyli mahsulotlarga eʼtibor qaratildi. Misol uchun, shirin va gazli ichimliklar, chips shaklidagi gazaklar, shirinliklar, yarimtayyor mahsulotlar va boshqalar shular jumlasidandir. Tadqiqotchilar tovuqli naggetslarni misol sifatida keltiradi — tabiiy tovuq filesiga qaraganda bir gramm naggetsda 30 baravar ko‘p plastik mikrozarra mavjud.
Ottava universiteti psixiatriya klinikasi shifokori Nikolas Fabiano shunday deydi: “Barchamizni tashvishga solishi kerak bo‘lgan dalillar tobora ko‘payib bormoqda. Amerika Qo‘shma Shtatlari kabi mamlakatlarda hozirgi vaqtda yuqori darajada qayta ishlangan mahsulotlar isteʼmol qilinadi. Kunlik ratsionning 50 foizdan ko‘prog‘ini qayta ishlangan, plastik mikrozarralar mavjud bo‘lgan mahsulotlar tashkil etadi”. Shuningdek, u tadqiqotning achinarli natijalarini eslatib o‘tdi: “Bu zarralar gematoensefalik to‘siq (miyani qon oqimidan ajratib turadigan membrana) orqali o‘tib, xavfli miqdorda to‘planishi mumkin”.
Izoh (0)