Ushbu ichimlik ertalab yoki kun davomida holsizlik kuzatilganda energiya baxsh etadi hamda yurak xastaliklari va qandli diabet xavfini kamaytiradi. Biroq ko‘pchilik qahvaning jigar salomatligini yaxshilashi mumkinligi haqida bilmaydi.
Qayd etish lozimki, qahva bo‘yicha quyidagi tadqiqot uning aynan qora turi haqidadir. Foydali qahvaga hech qanday sut, qaymoq, shakar va boshqa qo‘shimchalar qo‘shilmaydi. Albatta, bu bilan qahvaning boshqa turlaridan voz kechish shart emas, ammo qahvaning turi uning samaradorligiga to‘g‘ridan to‘g‘ri ta’sir qilishini unutmaslik kerak.
Qahvaning jigar fermentlariga ta’siri
Jigar shikastlanganda, qonga ko‘p miqdorda aspartat aminotransferaza (AST) va alanin aminotransferaza (ALT) fermentlari kiradi. Agar ularning qondagi darajasi past bo‘lsa, demak, jigar shikastlanmagan sanaladi. Shuningdek, bunday fermentlar toksinlarni parchalash, safro ishlab chiqarish jarayonida ishtirok etadi va infeksiyalarga qarshi kurashda yordam beradi.
Tadqiqotlarga ko‘ra, kundalik qahva iste’moli ALT va AST fermentlari darajasini kamaytiradi. Ushbu nazariya qahva tarkibida jigar sirrozidan himoya qiluvchi tarkibiy qism bor, degan farazni tasdiqlaydi.
Jigar fibrozi
Jigar fibrozi — bu jigar to‘qimalarining shikastlanishi natijasida sog‘lom hujayralarning biriktiruvchi to‘qima (chandiq) bilan almashishi jarayoni. Bunday holda, jigarda biriktiruvchi to‘qima o‘sa boshlaydi, ya’ni organ o‘zidagi yaralarni yopish uchun qo‘shimcha hujayralarni “o‘stirishga” harakat qiladi. Bu holat jigar faoliyatining yomonlashishiga olib kelishi mumkin va agar davolanmasa, sirroz hamda jigar yetishmovchiligiga sabab bo‘lishi mumkin. Bu alkogolizm, semizlik, gepatit B yoki C bilan og‘rigan bemorlarda juda keng tarqalgan tashxisdir.
Albatta, bunday kasallikka chalingan bemorlarni davolashga qahva yordam bermaydi, ammo aynan qahva (va o‘simlik choyi)ni tez-tez iste’mol qilish jigar to‘qimalarining zichligini pasaytiradi. Ya’ni jigar fibrozining rivojlanishi sekinroq kechadi.
Sirroz
Bundan tashqari, so‘nggi tadqiqotlarga ko‘ra, qahva alkogol tufayli hosil bo‘lgan jigar sirrozi xavfini kamaytirishga yordam beradi.
Jigar saratoni
Qahva jigar saratoni xavfini ham kamaytirishi mumkin. Bu yerda kalit so‘z — “mumkin”. Tadqiqot mualliflarining aytishicha, hozircha xulosa chiqarishga hali erta va tasdiqlovchi dalillarni to‘plash va ushbu nazariyani to‘liq o‘rganish uchun yana bir necha yil kerak bo‘ladi.
Izoh (0)