Kimyoviy aromatizatorlar qo‘shilgan shirin gazlangan ichimliklar mutlaq zararli ekanligiga hech kim eʼtiroz bildirmaydi. Oddiy gazli suv-chi, u shunchalik bezararmi? Quyida shu haqda so‘z boradi.
Nima uchun hamma gazli suvni yaxshi ko‘radi?
Bu yerda marketingsiz ish bitmadi. Garchi bozordagi gazlangan suvning hammasi ham minerallarga to‘yingan bo‘lmasa-da, gazlangan suv foydali degan stereotip shakllangan (garchi har doim tarkibiga qarash kerak bo‘lsa-da). Boshqa tomondan, ko‘pincha ortiqcha kaloriyalardan xalos bo‘lishga qaror qilgan odamlar gazlangan oddiy suvni ishtiyoq bilan ichishadi — ular kimyoviy limonadlardan voz kechishgan, ammo vijillash va pufakchalar ularga zararli ichimliklardan xalos bo‘lishni osonlashtiradi.
Gazlangan suvning zararlari va foydalari
Pufakchali suvning, har qanday mahsulot singari, o‘ziga xos xususiyatlari bor.
Gazli suv gidratsiya darajasini oshirishga yordam beradi
Agar siz ko‘proq suv ichishingiz kerak bo‘lsa va oddiy suvni icha olmasangiz — gazli suv iching. Axir, bu shunchaki karbonat angidridli toza suv. Diyetologlar va boshqa taomlanish bo‘yicha mutaxassislar asta-sekin “har har kishi uchun kuniga 3 litr suv” kabi qo‘rqinchli meʼyorlardan voz kechmoqdalar – suvni chanqoq paytida ichish kerak, lekin yetarlicha, uni choy, qahva va sharbatlar bilan almashtirmaslik kerak.
Gazli suv “mazaliroq”
Bu fakt oldingi bilan bog‘liq — vijillash va pufakchalar gazli ichimlikni haqiqatan ham “ishtaha ochuvchi” qiladi. Agar siz taomnomangizni sog‘lomlashtirish yo‘liga kirgan bo‘lsangiz, bu haqiqatan ham muhimdir. Sirop qo‘shishning hojati yo‘q, lekin siz har doim mineral suvga limon, rezavorlar yoki meva bo‘laklarini qo‘shishingiz mumkin.
Pufakchalardan qorin shishib ketishi mumkin
Bu ham haqiqat va toza fizika. Gazli suv ichganimizda, odatdagidan ko‘proq havo yutib yuboramiz. Karbonat angidrid bilan birgalikda bu noxush his-tuyg‘ularni keltirib chiqarishi mumkin — ayniqsa, siz taʼsirlangan ichak sindromidan aziyat chekayotgan bo‘lsangiz. Xuddi shu sababga ko‘ra, gazli ichimlik ich qotishi yoki aksincha, ich ketishiga olib keladi.
Gazli suvdan semirish mumkin
2017-yilda Amerikaning “Semizlikni o‘rganish va klinik amaliyot” jurnali gazlangan suvning eng ishtaha ochar vijillashi baʼzi odamlarda “ochlik gormoni” — grelin ishlab chiqarilishining ko‘payishiga olib kelishini tasdiqlovchi tadqiqotni eʼlon qildi.
Gazli suvdan ozish mumkin
Gazli suv kaloriyasiz to‘qlik hissini berishi mumkin. Bu haqida barcha gazli suvni yaxshi ko‘ruvchilar aytadi — u “bo‘sh” suvga qaraganda oshqozonni ancha ko‘proq to‘ldiradi. Gazlangan suv bo‘yicha tadqiqotlar kam, ammo sog‘lom fikr shuni ko‘rsatadiki, agar toza pufakchali suyuqlik shirin gazlangan ichimliklar o‘rniga ishlatilsa, bu tabiiy ravishda isteʼmol qilinadigan kaloriya miqdorini kamaytirishga yordam beradi.
Gazli suv miya uchun foydali
2022-yilda o‘tkazilgan tadqiqot shuni ko‘rsatdiki, sovuq gazlangan shakarsiz suv miya qon oqimini oshiradi. Stress holatiga qo‘yilgan tajriba ishtirokchilari muz solingan vijillaydigan suvdan ho‘plab, iliq va gazsiz suv berilgan hamkasblariga qaraganda hushyor, eʼtiborli, tetik va g‘ayratli bo‘lib qolishdi.
Gazli suv tishlarga zarar yetkazishi mumkin — va shakarning bunga hech qanday aloqasi yo‘q
Pufakchali suv oddiy suvga qaraganda past kislotalikka ega bo‘lishi mumkin, bu esa uzoq muddatda emalga taʼsir qilishi mumkin. Nervni himoya qiluvchi tish emalining ostidagi dentin ham karbonat angidrid bilan reaksiyaga kirishadi.
Bir so‘z bilan aytganda gazli suvni ichish zararlimi yoki foydali?
Gazli suv suvsizlanishdan, ortiqcha ovqatlanishdan qochishga imkon beradi — qisqasi, salomatlikka yaxshi xizmat ko‘rsatishga qodir. Ammo undan foydalanishning salbiy tomonlari ham bor. Shuning uchun har narsada me’yorga amal qilganingiz ma’qul.
Izoh (0)