Gonkonglik mashhur aktyor, Osiyo va G‘arb kinosida o‘ziga xos o‘rin egallagan Chou Yunfat joriy qil 18-may kuni tug‘ilgan kunini nishonladi. Aktyor “Yollanma qotil”, “Anna va qirol”, “Yorqin kelajak” hamda “Karib dengizi qaroqchilari: Dunyolar chegarasida” filmlaridagi obrazlari bilan mashhur.
Aktorlik faoliyati davomida Chou yuzdan ortiq kinolarda suratga tushdi, umumiy gonorarlari miqdori 720 million dollardan oshdi, biroq Chou Yunfat bu puldan deyarli foydalanmadi.
Kambag‘al oiladagi bolalikdan kino yulduzgacha
Chouga taqdir bolaligidan kulib boqmagan. U 1955-yilda Gonkong yaqinidagi chekka qishloqda tug‘ilgan va erta bolalikdan og‘ir kunlarni kechirgan. Uning otasi neft tankerida ishlagan, onasi esa uyda dim-sam (xitoycha taom) tayyorlab sotgan. Yosh Chou ota-onasiga yordam berar: mol boqar, bog‘larni sug‘orar, yer chopar, onasi bilan ko‘chada savdo qilar edi.
Keyin ular oilaviy Gonkongga ko‘chib kelishdi. Oilaning to‘ng‘ich farzandi bo‘lgan Chou o‘smirlik davrida maktabni tark etishga majbur bo‘ldi, bu uning tanlovi emas, balki zarurat edi. Uning har bir kuni yagona maqsad: ozgina bo‘lsa-da pul topish bilan boshlanar edi. Yosh yigit farroshlik qildi, pochta tarqatdi, kafelarda idish-tovoq yuvdi. U vijdoniga zid bo‘lmagan har qanday ishga tayyor edi, ammo baribir pul yetmasdi.
1973-yilda hammasi o‘zgardi: Chou tasodifan TVB telekanalida aktyorlik mahorati kursi uchun saralash imtihoni bo‘layotganini ko‘rib qoldi. Uning hech qanday tajribasi, uquvi yo‘q edi, lekin Chou qashshoqlikdan shu qadar charchagan ediki, omadini sinashga qaror qildi va bu urinish samara berdi. U kastingdan o‘tib, kichik bir rol oldi va nihoyat birinchi marta mehnati uchun yaxshi haq oldi.
Bu voqeadan keyin u aktyorlik kurslariga yozildi, kelajakdagi kasbini chuqur o‘rgana boshladi, yangi teleseriallarga sinovdan o‘tdi. Uzoq vaqt Chou faqat epizodik rollarda ishladi. 1986-yilda u taniqli rejissyorning e’tiboriga tushdi va Jon Vuning “Porloq kelajak” filmida bosh rolni ijro etdi. Mazkur film haqiqiy portlash bo‘lib, Chouni yulduzga aylantirdi.
Bir yil o‘tgach, u rejissyor Ringo Lem bilan ishlay boshladi va “Olovdagi qamoqxona”, “Olovdagi shahar” kabi loyihalarda yanada ko‘proq tanildi. Keyinchalik “O‘yinchilar xudosi”, “Tug‘ma o‘g‘ri” kabi filmlar Chouni Osiyo kinosining eng yaxshi aktyorlaridan biriga aylantirdi.
1998-yilda u “Yollanma qotillar” trilleri, “Anna va qirol” tarixiy-romantik dramasida ishtirok etdi. Jodi Foster bilan juftlik gavdalangan film tomoshabinlar va tanqidchilar tomonidan iliq kutib olindi.
Saxiylik va matonat
Chou Yunfat mashhurlik va shuhrat cho‘qqisiga chiqqanida ham dabdabali hayotga berilmadi. U boyligini ko‘z-ko‘z qilishdan voz kechdi, oddiy hayot tarzini afzal bildi. U jamoat transportidan foydalanadi, restoranlarga bormaydi, uyda ovqatlanadi va qimmatbaho buyumlarni xarid qilmaydi.
Aktyorning hisob-kitoblariga ko‘ra, Chouning shaxsiy xarajatlari bir oyda 150 dollardan oshmaydi. Garderobidagi kiyimlar yangilanmaydi, faqat juda eskirib qolganida almashtiriladi. Uning rafiqasi Jasmin ham bu turmush tarzini to‘liq qo‘llab-quvvatlaydi. Ular birga xayriya jamg‘armasi tashkil qilishgan va muntazam ravishda muhtojlarga yordam berib kelishadi. Chouning falsafasiga ko‘ra, boylik faqat yaxshilikka xizmat qilgandagina qiymatga ega.
Sevgi sinovlari
Filmlarda Chou Yunfat doimo kuchli va jasur qahramonlar rolini ijro etadi, ammo aktyorning kamera ortidagi hayoti ideal bo‘lmagan. Uning ilk muhabbati aktrisa Kendi Yu edi. Bu munosabatlar uzoq davom etgan, lekin ular ajralgan. Keyinchalik yana birga bo‘lishga urinib, rasman turmush qurishgan, biroq nikoh bir yildan ortiq davom etmagan.
Aktyorning keyingi muhabbati aktrisa Idi Chan edi, ularning munosabati besh yil davom etgan. Chouning onasi Idi Channi qabul qilmadi, aktyor esa onasiga qarshi chiqishga jur’at topa olmay, Idi bilan ham ajrashgan.
1983-yilda Chou Jasmin Tan bilan turmush qurdi. To‘ylaridan besh yil o‘tib, Jasmin homilador bo‘ldi. Shifokorlar hech qanday xavf haqida ogohlantirishmagan bo‘lsa-da, tug‘ruqdan bir hafta oldin chaqaloq harakatdan to‘xtadi. Ular intiqlik bilan kutgan qizaloq kindik o‘qiga o‘ralib, vafot etdi. Oradan uzoq yillar o‘tgach ham oila farzandli bo‘la olmadi.
Bugungi kunda Chou Yunfat suratkashlik bilan shug‘ullanadi va yaqinda o‘zining yangi fotosuratlar ko‘rgazmasini taqdim etdi.
Izoh (0)