Tom Hardi Esquire U.K. jurnaliga bergan intervyusida salomatligi endi avvalgidek bo‘lmasligi haqida aytdi. Yillar davomida suratga olish maydonlaridagi janglar aktyorga o‘z ta’sirini ko‘rsatmoqda.
“Men tizzamdan ikki marta operatsiya bo‘ldim, umurtqa diski churrasiga uchradim, yana ishiasga ham chalindim (katta o‘mrov nerv — ishiad nervning yallig‘lanishi yoki siqilishi natijasida paydo bo‘ladigan oyoqdagi og‘riqli holat)”, dedi Hardi.
Aktyorning so‘zlariga ko‘ra, u plantar fassiit (tovon bilan oyoq qismi oralig‘idagi plantar fassiya deb ataluvchi payning yallig‘lanishi) kasalligiga ham uchragan:
“Bularning bari qayerdan paydo bo‘ldi? Nega? Nima uchun?! Bundan tashqari, sonimdagi payni cho‘zib olganman. Butun tanam parchalanib ketgandek go‘yo. Menimcha, ahvolim yaxshilanishi dargumon”, deya yakunladi u.
Britaniyalik aktyor, prodyuser va ssenariy muallifi Tom Hardi o‘zining kuchli xarakterli rollari bilan tanilgan. U 1977-yil 15-sentyabrda Londonda tug‘ilgan. Hardining aktyorlik faoliyati teatr sahnasidan boshlangan bo‘lsa-da, u kino olamida ham tezda muvaffaqiyat qozondi. Uning katta yutuqlari orasida “Yovuz ritsar: Afsonaning qaytishi” filmidagi Beyn, “Telba Maks: G‘azab yo‘li” filmidagi Maks Rokatanski, shuningdek, “Venom” trilogiyasidagi bosh rollari mashhur.
Tom Hardi jismonan o‘ziga doim talabchan bo‘lgan va ekstremal rollarga tayyorlanishda tanasini ham, irodasini ham ayamagan. U ko‘p marta film uchun tanasini o‘zgartirgan: mushak massasini to‘plagan, og‘ir mashg‘ulotlarni bajargan, kurash va jang san’atlari bilan shug‘ullangan. Aktyor “Omon qolganlar”, “Jangchi” va “Venom” trilogiyasidagi suratga olishlar vaqtida ko‘plab jarohatlar olgan.
Izoh (0)