Yosh aktrisa, model, instabloger Nozanin Gaffarova “Daryo”ga maxsus intervyu berdi. U intervyu davomida raqqosalikni nima sababdan tashlagani, oilani deb karyeradan voz kechmasligi va mashhur teleko‘rsatuvda tanqidga uchragani haqida gapirdi.
“Jarohat olgach, raqqosalikni tashladim”
— Bolaligimdan sanʼatkor bo‘lishni istaganman. Aktrisa bo‘lmaganimda, jurnalist bo‘lardim, lekin aniq sanʼat va madaniyat sohasini tanlardim. Yetti yoshimdan beri sahnadaman, musiqa maktabiga borib, raqs bilan professional shug‘ullanganman. Raqs bilan shug‘ullansam, maza qilaman, maxsus kostyumlar juda yoqadi. “Bahor” ansamblida bir yil professional raqqosa bo‘lib ishladim. Belimdan jarohat olganimdan so‘ng, shifokorlar raqs bilan doimiy shug‘ullanishni taqiqlab qo‘ydi. Sog‘lig‘im sababli kasbimdan kechishga majbur bo‘lganman. Baʼzi insonlar raqqosalarga nisbatan yomon munosabatda bo‘ladi. Men doim madaniyatli, raqsni tushunadigan insonlar davrasida bo‘lganman. Shu sababli hech qachon yomon munosabatga duch kelmaganman, dedi aktrisa.
“Aktyorlik mahoratimdan qoniqmayman”
— Sanʼatkor o‘zidan hech qachon qoniqmaydi. Shu jumladan, men ham o‘zimni yetarli darajada iqtidorli deb hisoblamayman. Kechalari uxlamay, suratga olish maydonchalarida qolib ketamiz. Mehnat ham kerak, faqat iqtidorning o‘zi bilan ish bitmaydi. “Tashrif qog‘ozi” bo‘ladigan rolimni hali ijro etmadim. Orzumdagi rol — detektiv xonim obrazi. Yoshligimdan detektiv filmlar ko‘p ko‘rganim uchun aynan shunday obrazni gavdalantirishni xohlardim, deydi Nozanin.
“Turmush qurishimni o‘ylab, bunday rollarni rad etyapman”
— Avval salbiy rollardan qo‘rqmasdim, aksincha salbiy obrazda maza qilardim. Hozir esa salbiy rollarni ham tanlab-tanlab ajrataman. Qahramon nima uchun salbiyligi, kelib chiqishiga qarayman. Qiz bolaman, faqat karyerani, syomkani o‘ylash xato. Kelajagimni o‘ylagan holatda, shu qarorga keldim. Tomoshabinlar, ayniqsa bizning tomoshabinlar ishonuvchan. Shu sababli ham meni yomon ko‘rib qolishmasin, turmushga chiqsam bu obrazlarim turmushimga ham xalal bermasin, deb salbiy obrazlarda chiqishni kamaytirdim. Bu qarorimni to‘g‘ri deb hisoblayman.
“Endi iqtidor bo‘lsa, diplom shart emas. Ustozlarning metodlari bu yog‘iga qo‘llanilmaydi”
— Qo‘shiq ham kuylayman, bu hozircha hobbi. Keyinchalik balki kasbga aylanib ketishi mumkin. Hozircha xonandalikka daʼvogarligim yo‘q, tanlash jarayonidaman. Qo‘shiq kuylashni o‘zim juda yaxshi ko‘raman.Vokaldan ham dars olganman. Keyinroq nasib qilsa, albom chiqarish niyatim bor, ammo hozir emas. Shu paytgacha hech qachon mablag‘ masalasini birinchi o‘ringa qo‘ymaganman, qo‘ymaslikka ham harakat qilaman. To‘g‘ri, pul kerak bo‘ladi baribir. Ammo qilayotgan ishimni yaxshi ko‘rib, chin dildan bajarmasam, dunyoning pulini bersa ham qilmayman.
Instagramʼda chiqish uchun ham odamda aktyorlik mahorati bo‘lishi kerak. Men hamma blogerning ham aktyorlik mahorati bor demayman. Ammo sanʼat sohasida o‘qimagan bo‘lsa-da, mahorati o‘qiganlardan-da zo‘rlarini ko‘rganman. Bu narsaga katta aktyor-aktrisalarning g‘ashi kelishi mumkin, bunga haqlari ham bor. Ammo yangi chiqib kelayotgan avlodda iqtidor bo‘lsa, o‘qishi va diplom bo‘lishi shart deb o‘ylamayman. Zamon o‘zgardi, ustozlarimiz davridagi metodlar bundan keyin qo‘llanilmaydi. Internet rivojlangan, buni filtrlash ham imkonsiz, dedi Nozanin Gaffarova.
“Oila deb san’atdan voz kechmayman”
— Yoshligimdan orzu qilib, mehnat qilib, kechalari uxlamay stressga tushib, yig‘lab, ovqatlanmay qo‘yib erishgan darajamni tashlab ketishga, menimcha, hech nima arzimaydi. Arzirli narsa bor deb o‘ylamayman. Oilani nazarda tutmayapman. Haqiqatdan meni sevadigan, uylanmoqchi bo‘ladigan inson bo‘lsa, qandaydir shart qo‘ymaydi. Orzularim, karyeram bilan birga sevadi. Karyerangni tashlaysan, uyda o‘tirasan deydigan bo‘lsa, rozi bo‘lmayman. Bir necha yillik mehnatlarimning mevasini ko‘rayotgan vaqtimda bariga qo‘l siltab shundoq tashlab ketolmayman. Hattoki bu oila bo‘lsa ham. Odamlar nima deb o‘ylashining farqi yo‘q, deydi aktrisa.
“Bollivud battl”da qatnashib, katta negativga uchradim”
— “Bollivud battl”da qatnashishni shu darajada xohlaganmanki, uch oy davomida Xudodan duo qilib so‘raganman. Sentyabr oyida menga aloqaga chiqib, ko‘rsatuvga taklif qilishgan. Bu loyiha men uchun omadli keldi, yuzim yanada tanildi. Sanʼatning ichidagi insonlardan bekor qatnashibsan, degan gaplarni ham eshitdim. Lekin o‘zim haqiqatan maza qildim.
Negaligini bilmayman-u, ammo shu loyihadagi ishtirokim davomida juda katta negativga uchradim. Buni qabul qilish juda qiyin bo‘ldi. Partnyorimning aybi Rixsitilla Abdullayevning o‘g‘li bo‘lgani, mening aybim Rixsitilla akaning o‘g‘li bilan shu loyihada qatnashayotganim bo‘lgan. Kimdir loyihadan chiqib ketsa ham, boshqa narsa bo‘lsa ham bizning videomiz izohiga negativ yozishardi. Instagram yoki YouTubeʼda video chiqqach, mingta izoh yozilgan bo‘lsa, shundan 900 tasi negativ bo‘lardi. Bilmayman, nega? Ko‘p izohlar boshqa millat madaniyatni targ‘ib qilishda ayblash, mentalitet haqida bo‘lardi. Hali bu qadar katta muhokamalarga tayyor emasligimni shunda tushunganman.
Bu loyihada qatnashganimdan hech qachon afsuslanmayman. Qariganimda ham kulib eslaydigan xotira va emotsiyalar qoldi, deydi Nozanin.
Ma’lumot uchun, Nozanin Gaffarova 2002-yilda tug‘ilgan. Hozirda u 22 yoshda bo‘lib, San’at va madaniyat oliygohining uchinchi bosqich talabasi.
Suhbatni to‘liq holda DaryoLifestyle YouTube sahifasida tomosha qilishingiz mumkin.
Izoh (0)