Qozog‘iston poytaxti Ostonada Qozog‘iston va Markaziy Osiyoda ro‘yxatdan o‘tkazilgan ilk spot Bitcoin ETF — Fonte Bitcoin Exchange Traded Fund OEIC PLC (BETF) savdosi boshlandi. Bu haqda Qozog‘istonning Astana International Exchange (AIX, Birja) matbuot xizmati xabar berdi.
“Fonte Capital Ltd kompaniyasi boshqaradigan BETF jamg‘armasi investorlarga bitkoin narxlari o‘zgarishidan tartibga solingan va shaffof tarzda foydalanish imkonini beradi, bunda aktivga bevosita egalik qilish shart emas”, deyiladi birja xabarida.
AIX bozorlari va mahsulotlari bo‘yicha boshqaruvchi direktori Birjan Astayevning aytishicha, Qozog‘istondagi birinchi spot Bitcoin ETFning debyuti mamlakat kapital bozorini rivojlantirishda yangi sahifa ochib, raqamli aktivlarni investitsiya sanoatining asosiy yo‘nalishiga aylantiradi.
“Bu qadam Qozog‘istonni tartibga solinadigan raqamli moliyaning asosiy mintaqaviy markaziga aylantirish yo‘lidagi muhim qadamdir”, deya qo‘shimcha qildi u.
BETF’ning har bir aksiyasi jismonan bitkoin bilan ta’minlangan bo‘lib, uni saqlash vazifasini AQSHning BitGo Trust kastodiani bajaradi.
Aktivlar 250 million dollargacha sug‘urtalangan bo‘lib, buzilish yoki mablag‘larni yo‘qotish xavfini kamaytirish uchun sovuq oflayn saqlash va himoyalangan omborxonalardan foydalaniladi.
Jamg‘arma “Ostona” xalqaro moliyaviy markazi (AIFC) tomonidan boshqariladi. AIFC vakillari ta’kidlashicha, bu markaz xalqaro sanksiyalar orqali aktivlarni muzlatib qo‘yishdan himoya qilish va chet el emitentlariga qaramlikni kamaytirish imkoniyatini yaratishi mumkin.
AIFC allaqachon raqamli aktivlar uchun huquqiy bazani joriy etib, o‘z hududida litsenziyalangan birjalar, kastodianlar va investitsiya mahsulotlari faoliyatiga ruxsat bergan.
Fonte Capital ta’kidlashicha, BETF investorlarga “yuqori darajadagi nazorat va ishonchlilikni saqlab qolgan holda portfelga bitkoin qo‘shishning qulay usulini” taqdim etadi.
Izoh (0)