Gonkonglik aktyor, rejissyor, musiqachi, kaskadyor, jang san’ati ustasi Jeki Chan qachon kaskadyorlik ishlarini mustaqil bajarishni to‘xtatishi haqida ma’lumot berdi.
“Men har doim barcha murakkab tryuklarni o‘zim bajarib kelganman. Bu meni asl holimcha ekranda ko‘rinishimga yordam beradi. Va men buni nafaqaga chiqqunga qadar davom ettiraman, ammo bu hech qachon yuz bermaydi”, dedi 71 yoshli aktyor.
Chan aktyorlik san’atiga bo‘lgan jiddiy yondashuvi anchayin xavfli ekanini tan oladi, shuningdek, tryuklarni grafik vositalar yordamida yaratish mumkinligini ham biladi. Biroq u kompyuter grafikasidan foydalanish kadrning realistik ko‘rinishiga salbiy ta’sir qiladi, deb hisoblaydi.
Jeki Chan 1954-yil 7-aprelda Gonkongda tug‘ilgan. To‘liq ismi — Chan Kong-Sang. Jeki Chan bolaligidan sahna san’ati bilan shug‘ullangan va Gonkongdagi Opera maktabida akrobatika hamda jang san’atlarini o‘rgangan.
Uning aktyorlik faoliyati 1960-yillarda boshlangan bo‘lsa-da, 1970–1980-yillarda mashhurlikka erishgan. Jeki Chan o‘z rollarini ko‘pincha o‘zi ijro etgan kaskadyorlik sahnalari bilan mashhur. U jangari janrini komediya bilan birlashtirgan aktyorlardan biri bo‘lib, bu uslub uni butun dunyoga tanitdi.
Jahon kinosining tirik afsonasi bo‘lgan Chan uchun 90-yillarning oxiri va 2000-yillar aktyorlik faoliyatining faol davri bo‘lgan. Gollivudning “Tig‘iz vaqt”, “Shanxaylik shovvozlar” kabi filmlaridagi obrazidan ko‘ngli to‘lmagach, u o‘zining prodyuserlik kompaniyasiga asos soldi va asosiy e’tiborni Gonkong kinosiga qaratdi. Jeki Chan muxlislari aktyorning kinodagi qahramoni bilan birlashib ketgan ajoyib xarakteri uchun yaxshi ko‘radi. U yuzlab jarohatlar olgani va bir nechta operatsiyalarni boshidan o‘tkazganiga qaramay, ijod yo‘lida davom etishi barchani hayratga soladi.
Izoh (0)