Buyuk Britaniya qirg‘oqlari yaqinida harbiylar Rossiya tomonidan mamlakatning atom suvosti kemalarini kuzatish uchun ishlatilishi mumkin bo‘lgan sensor datchiklarni aniqladi. Bu haqda The Sunday Times xabar berdi.
Jurnalistlar bu borada sobiq mudofaa vazirlari, yuqori martabali harbiylar va ekspertlar bilan suhbatlashdi. Bir nechta qurilma qirg‘oqqa chiqib qolgani tufayli aniqlangan. Qolganlari Britaniya harbiy-dengiz flotining mina qidiruvchi kemalari yordamida topilgan. Bu qurilmalar “so‘nggi yillarda” aniqlangani aytilmoqda.
Britaniya Mudofaa vazirligi versiyasiga ko‘ra, ular yadroviy kallakli raketalar bilan jihozlangan to‘rtta Britaniyaning Vanguard suvosti kemalari harakatini kuzatish uchun Moskva tomonidan o‘rnatilgan.
The Sunday Times nashrining ikki suhbatdoshi ta’kidlashicha, taxminan 2020-yilda Britaniya uchun “o‘ta muhim” suvosti kabellari yonida Rossiyaning suvosti dronlari topilgan.
Yaqin atrofda hech qanday kema bo‘lmagani uchun dronlar kabellarga yetib kelish uchun uzoq masofalarni bosib o‘tgan deb taxmin qilish mumkin, deyiladi xabarda.
Mudofaa vazirligi dronlar suvosti aloqa tizimlariga zarar yetkazishga uringanini aytmoqda. Biroq bugungi kunda buning uddasidan chiqqaniga hech qanday dalil yo‘q.
The Sunday Times nashrining Mudofaa vazirligidagi uch nafar suhbatdoshi aytishicha, Rossiya qo‘shinlarining Ukrainaga keng ko‘lamli bostirib kirishidan oldin ham Londonda rossiyalik milliarderlarning superyaxtalari Buyuk Britaniya qirg‘oqlari yaqinida razvedka uchun ishlatilgani haqida ma’lumotlar bo‘lgan.
2018-yilda Britaniyaning HMS Albion desant kemasi “rus oligarxi”ga tegishli ulkan yaxta uning yonida to‘xtagach, Limassoldagi portni tark etishga majbur bo‘lgan. Kema ekipaji yaxta yashirin kuzatuv olib borayotganini gumon qilib, portni tark etgan.
Yuqori martabali harbiylar suv ostidagi texnologik raqobatni sovuq urush davridagi AQSH va Sovet Ittifoqi o‘rtasidagi kosmik poygaga qiyoslamoqda.
Izoh (0)