Yevropa Ittifoqi Rossiyadan ehtimoliy hujum xavfiga tayyor turish maqsadida qurol xarid qilish uchun maxsus fond — European Defence Mechanism (EDM)ni tashkil etishni rejalashtirmoqda. Bu haqda Reuters xabar berdi.
Yevropa moliya vazirlari ushbu masalani muhokama qilishni rejalashtirmoqda. Rejaga ko‘ra, EDM qurol-yarog‘ xarid qiladi, undan foydalangan davlatlardan to‘lov oladi va kredit ajratadi. Fondga Yevropa Ittifoqiga a’zo bo‘lmagan davlatlar, xususan, Buyuk Britaniya, Ukraina yoki Norvegiya ham qo‘shilishi mumkin.
Mazkur loyiha Rossiyaning ehtimoliy hujumiga qarshi tayyorgarlikni qanday moliyalashtirish kerakligi yuzasidan olib borilayotgan kengroq munozaralarning bir qismi sanaladi. Chunki Yevropa xavfsizlik masalalarida endi AQSHga to‘liq tayanib bo‘lmasligini anglab yetmoqda.
Fond davlat qarzi darajasini oshirmagan holda mudofaa uchun katta hajmdagi mablag‘larni jalb etishga imkon yaratadi. Asosiy e’tibor strategik qo‘llab-quvvatlash vositalariga — hozirda AQSH tomonidan taqdim etilayotgan qimmat infratuzilmalar va harbiy jihozlarga qaratiladi. Jumladan, qo‘shma qo‘mondonlik, sun’iy yo‘ldosh razvedkasi, 5 va 6-avlod qiruvchi samolyotlari, havo hujumidan mudofaa va yadroviy to‘siq tizimlari shular jumlasidandir
EDM tashkil etish tashabbusi hozirda Yevropa Ittifoqiga raislik qilayotgan Polshaga tegishli. Polsha buyurtmasiga ko‘ra, Yevropadagi Bruegel tahlil markazi loyiha tavsifini ishlab chiqqan. Hujjat 12-aprel kuni Varshavada muhokama qilinadi.
Izoh (0)