Samarqand xalqaro iqlim forumi mintaqa yuzlashayotgan ekologik muammolarni muhokama qilish uchun platforma vazifasini bajardi. Shu bilan birga, bu boradagi milliy strategiyalarni mintaqaviy manfaatlar bilan muvofiqlashtirish, uni esa o‘z navbatida, global sa’y-harakatlar bilan uyg‘unlashtirish imkonini berdi.
Forumda mintaqaning beshta davlati hamda Mo‘g‘ulistonning ekologiya va suv xo‘jaligi vazirlari, shuningdek, Yevropa Ittifoqi, Jahon banki kabi xalqaro institutlarning yuqori darajali rasmiylari ishtirok etdi.
Tadbirning ikkinchi kuni rasmiylar hamda ekspertlar atrof-muhit muammolari bilan bog‘liq mavzularda panel muhokamalarini olib bordi. “Markaziy Osiyoda iqlim o‘zgarishi sharoitida suv resurslarini integratsiyalashgan holda boshqarish” mavzusidagi sessiya shular jumlasidan.
Unda O‘zbekiston tomonidan suv xo‘jaligi vaziri Shavkat Xamrayev qatnashdi. Vazir tejamkor texnologiyalardan kengroq foydalanish, sug‘orish infratuzilmasini yaxshilash zarurligini ta’kidladi. Turkmaniston suv xo‘jaligi davlat qo‘mitasi raisi Durdi Gendjiyev esa O‘zbekiston tajribasidan namuna olinib, Qoraqum kanali betonlashtirilishini ma’lum qildi. “Daryo” sessiyada qatnashgan iqlimshunos Erkin Abdulahatovning Qo‘shtepa kanali va boshqa mavzulardagi fikrlariga qiziqdi.
Iqlimshunos, shuningdek, kanal va ariqlarni betonlashtirishning yerosti suvlari, flora va faunaga ta’siri haqidagi savolga javob berdi.
Shu kuni “Markaziy Osiyo uch tomonlama sayyora inqirozi qarshisida” mavzusidagi panel muhokamasi ham bo‘lib o‘tdi. Sessiyada nutq so‘zlagan O‘zbekiston Respublikasi ekologiya, atrof-muhitni muhofaza qilish va iqlim o‘zgarishi vaziri Aziz Abduhakimov mintaqa yuzlashayotgan ekologik muammolarga to‘xtaldi.
Vazir, shuningdek, mamlakat Yevropa Ittifoqining ilg‘or texnologiyalaridan kengroq foydalanish imkoniga ega bo‘layotganini aytib, Jahon banki tomonidan O‘zbekistonda o‘rmon maydonlarini kengaytirish uchun 142 mln AQSH dollari ajratilishini ma’lum qildi.
Jahon bankining Markaziy Osiyo bo‘yicha mintaqaviy direktori Tatyana Proskuryakova tashkilot O‘zbekiston hukumati tomonidan forum doirasida ilgari surilgan tashabbuslarni qo‘llab-quvvatlashga tayyorligini bildirdi.
Aziz Abduhakimov, o‘z navbatida, iqtisodiy loyihalar ekologik ekspertizadan o‘tkazilishini qo‘shimcha qildi.
Vazir, shuningdek, Jahon banki mablag‘lari hisobidan ekilgan ko‘chatlar qarovsiz qolib ketmaydimi degan savolga javob qaytardi. Aziz Abduhakimovga ko‘ra, ularning parvarishi bilan O‘rmon xo‘jaligi agentligi shug‘ullanadi.
“Iqtisodiy omil muhim”
“Daryo” forumda qatnashgan ekspertlarga ham mikrofon tutdi. 2019-yildan buyon Orol dengizining suvi chekingan hududlarda saksovul ekish bilan shug‘ullanayotgan yaponiyalik mutaxassis shular jumlasidan. OISCA tashkiloti ijrochi vitse-prezidenti Nagaishi Yasuaki atrof-muhit muammosi o‘tkir hududlarda ish o‘rinlarini yaratish muhim deb hisoblaydi. Uning fikricha, aholi bo‘lmasa, ekologik muammolarni bartaraf etish harakatlari ham o‘z ahamiyatini yo‘qotadi.
Shu kuni bir necha sessiya doirasida iqlim o‘zgarishining ekotizimlarga ta’sirini yumshatish, yo‘qolib ketish xavfi ostida turgan turlar va yashash joylarini saqlash, havo, suv va tuproq ifloslanishining ekotizimlarga salbiy ta’sirining oldini olish, tabiiy resurslarni barqaror boshqarish, muhofaza etiladigan tabiiy hududlarni tashkil etish kabi mavzularda muhokamalar bo‘lib o‘tdi. Tomonlar xalqaro va mintaqaviy hamkorlikni mustahkamlashga kelishdi.
Izoh (0)