Yevropa komissiyasi rahbari Ursula fon der Lyayen AQSH prezidenti Donald Tramp tomonidan joriy etilgan bojlarni butun dunyo bo‘ylab biznes va iste’molchilarga jiddiy zarba deb atadi.
Yevropa javob berishga tayyor. Biz har doim manfaatlarimiz va qadriyatlarimizni himoya qilamiz. Shu bilan birga, hamkorlikka va qarama-qarshilikdan muzokaralarga o‘tishga tayyormiz, deb yozdi Ursula fon der Lyayen o‘zining X sahifasida.
U Trampning global savdo tizimidagi kamchiliklar tufayli ba’zilar “adolatsiz foyda” olayotgani haqidagi pozitsiyasiga qo‘shilishini va uni hozirgi voqelikka moslashtirish uchun sa’y-harakatlarni qabul qilishga tayyorligini aytdi. Biroq, tariflar tizimni “tuzatishga” yordam bermasligini ma’lum qildi.
Yevrokomissiya rahbari AQSH tomonidan joriy qilingan po‘lat va alyuminiy bojlari sababli Yevroittifoq javob choralarini yakunlayotganini ma’lum qildi. Shuningdek, muzokaralar barbod bo‘lsa, Yevropa o‘z manfaatlari va bizneslarini himoya qilish uchun qo‘shimcha qarshi choralar ko‘rib chiqadi.
12-martdan boshlab Tramp Yevropa ittifoqidan 28 milliard dollarlik po‘lat va alyuminiy importiga 25 foizlik bojlar joriy etildi. Fon der Lyayen shu kuni Yevropa ittifoqining 26 milliard dollarlik “kuchli, ammo mutanosib” qarshi choralarni joriy etish qarorini e’lon qildi.
Tramp O‘zbekiston tovarlariga ham boj solmoqda
2-aprel kuni Tramp o‘nlab mamlakatlarga nisbatan “o‘zaro” bojlari joriy etilishini ham e’lon qildi. Yevropa ittifoqi uchun tarif 20 foizni tashkil etadi. Chora 9-apreldan kuchga kiradi. AQSH prezidenti jami 185 ta davlat, jumladan, O‘zbekiston tovarlariga (10 foiz) ham bojlar joriy etdi. Biroq ko‘plab davlatlar uchun tariflar yuqoriroq bo‘lib chiqdi.
Xususan, Xitoydan keladigan tovarlarga bojlar 34 foizni, Yevropa ittifoqi mamlakatlaridan 20 foizni, Shveysariyadan 31 foizni, Isroildan 17 foizni, Qozog‘istondan 27 foizni tashkil etadi. Vyetnam (46 foiz), Kamboja (49 foiz), Laos (48 foiz) eng yuqori tariflarga ega bo‘ldi. AQSH prezidenti hatto odamlar yashamaydigan Xerd va Makdonald orollariga ham boj joriy etdi. Bu orollarda minglab pingvinlar mavjud. Tramp yengil avtomobillar, yuk mashinalari va ularning ehtiyot qismlari importiga 25 foizlik bojlar joriy etish to‘g‘risidagi farmoyishni ham imzoladi.
Izoh (0)