Isroil o‘zining eng yirik savdo hamkori bo‘lgan AQSHdan import qilinadigan mahsulotlar uchun bojxona to‘lovlarini bekor qildi. Bu haqda Anadolu xabar berdi.
Qaror bosh vazir Binyamin Netanyaxu boshchiligidagi hukumat tomonidan qabul qilingan. Bosh vazir devoni, Moliya vazirligi hamda Iqtisodiyot va sanoat vazirligi qo‘shma bayonot e’lon qilgan. Unga ko‘ra, 1985-yilda AQSH bilan imzolangan erkin savdo bitimi doirasida Isroil hozirda ushbu mamlakatdan import qilinadigan mahsulotlarning 99 foiziga boj solmaydi.
2024-yilda Isroildan AQSHga tovarlar eksporti 17,3 milliard dollar, xizmatlar eksporti esa 16,7 milliard dollarni tashkil etdi.
Amerika mahsulotlariga bojxona to‘lovlarini bekor qilish mening hukumatim olib borayotgan bozorni raqobatga ochish, iqtisodiyotni diversifikatsiya qilish va yashash narxini pasaytirishga qaratilgan siyosatining navbatdagi qadami. Bu nafaqat iqtisodiy foyda keltiradi, balki Isroil va AQSH o‘rtasidagi ittifoqni yanada mustahkamlash imkonini ham beradi, deya izoh berdi Isroil bosh vaziri Binyamin Netanyaxu.
Moliya vaziri Betsalel Smotrich esa bu borada shunday dedi:
Bojxona to‘lovlarining bekor qilinishi Isroil uchun foydali bo‘ladi. Bu hukumatning yashash narxining oshishiga qarshi kurashish siyosatiga mos keladi. Hatto oziq-ovqat sohasida ham raqobat kuchayadi, dedi u.
E’tiborlisi, Isroil bu qarorni AQSHning javob tariflarini joriy etish to‘g‘risidagi qarori kuchga kirishidan sal oldin qabul qilmoqda. Prezident Donald Tramp 2-apreldan “o‘zaro” (“javob”) tariflar joriy etishni rejalashtirmoqda. Bu Amerika tovarlariga bojlar solgan, Amerika korxonalari, ishchilari va iste’molchilari uchun “adolatsiz va kamsituvchi” soliqlar o‘rnatgan mamlakatlarga ta’sir qiladi. Oq uyga ko‘ra, bunday choralar AQSHning savdo munosabatlarini muvozanatga keltirish, mahalliy sanoatni rivojlantirish va Trampning turli saylovoldi va’dalarini, jumladan soliq yengilliklarini amalga oshirish uchun zarur mablag‘larni ta’minlashga yordam berishi kerak.
Izoh (0)